काँग्रेसका निवर्तमान सभापति देउवा सहित कसकसले टिकट पाएनन् ?
काठमाडौँ, ७ माघ ।
नेपाली काँग्रेसले पुराना नेताहरुसंगै बिभिन्न भ्रष्टाचार काण्ड र घट्नामा मुछिएका नेताहरुलाई यस पटक टिकटबाट बञ्चित गरेको छ । काँग्रेसबाट टिकट पाउने अधिकांश नयाँ अनुहार छन् ।
नेपाली काँग्रेसका निवर्तमान सभापति शेर बहादुर देउवा र उनकी पत्नी डा. आरजु राणा नै यस पटक टिकटबाट बञ्चित भए ।
यस पटक काँग्रेसमा टिकटबाट बञ्चित हुनेहरुमा निवर्तमान सभापति, निवर्तमान कार्यबहाक सभापति, निवर्तमान उपसभापति, महामन्त्री, सहमहामन्त्री, कोषाध्यक्ष लगायतका पदाधिकारीहरु छन् ।
२०४८, २०५१, २०५६, २०६४, २०७०, २०७४ र २०७९ मा समेत गरी सात पटक जितेका देउवा २०६४ मा कञ्चनपुर र २०७० मा कैलालीबाट समेत निर्वाचित भएका थिए । निर्वाचनमा कहिल्यै पराजित नभएका देउवा यस पटक पनि निर्वाचन लड्न ईच्छुक थिए । सोमबार मध्यराति देउवाले निर्वाचन नलड्ने घोषणा गरे । र, डडेल्धुराबाट नैनसिंह महरले टिकट पाए ।
बर्तमान उपसभापतिद्वय विश्वप्रकाश शर्मा र पुष्पा भुसालले पूर्व घोषणा अनुसार टिकट लिएनन् । सहमहामन्त्री डा. डिला संग्रौलाले टिकट पाएनन् । संग्रौलाले चुनाव लड्न चाहेको मोरङ ६ बाट डा. शेखर कोइरालाले टिकट पाएका छन् ।
निवर्तमान उपसभापति धनराज गुरुङ, पूर्वउपसभापतिहरू गोपालमान श्रेष्ठ, प्रकाशमान सिंह र कांग्रेसका संस्थापक नेता विश्वेश्वरप्रसाद कोइरालाका पुत्र पूर्व महामन्त्री सशांक कोईरालाले यस पटक टिकट पाएनन् ।
स्याङ्जा–२ बाट चुनाव लड्दै आएका गुरुङ र श्रेष्ठ दुबै जना टिकटबाट बञ्चित हुदा गुरुङले पनि आफूले नै चुनाव लड्न नचाहेर टिकट नलिएको बताएका छन् । २०७९ मा स्याङ्जा–२ बाट गुरुङले चुनाव जितेका थिए । काठमाडौँ–१ बाट चुनाव जित्दै आएका सिंहलाई पनि काँग्रेसले टिकट दिएन् ।
पूर्वसहमहामन्त्रीहरू बद्री पाण्डे, जीवन परियार र उमाकान्त चौधरी पनि यस पटक टिकटबाट बञ्चित भए । २०७९ मा चितवनमा रवि लामिछानेसंग पराजित पूर्व कोषाध्यक्ष उमेश श्रेष्ठले पनि टिकट पाएनन् ।
२०७०, २०७४ र २०७९ गरी तीन पटक नवलपुर–१ बाट चुनाव जितेका डा. शशांक कोइरालाले पनि यस पटक टिकट पाएनन् ।
कतिपय नेताहरुले टिकट बाडिनुअघि नै उम्मेदवार नबन्ने घोषणा गरेका थिए । त्यसरी घोषणा गर्नेमा दार्चुलाका दिलेन्द्र प्रसाद बडु, सोलुखुम्बुका बलबहादुर केसी, उदयपुर–१ का डा. नारायण खड्का, काठमाडौँ–१० का राजेन्द्रकुमार केसी र सुर्खेत–२ का हृदयराम थानी थिए । उनीहरुले स्वेच्छाले टिकट नलिदा थुप्रै नेताहरु आकांक्षी हुदा हुदै पनि टिकटबाट बञ्चित भए । निवर्तमान कार्यबहाक सभापति पूर्ण बहादुर खड्काले नैतिकताको कारण देखाउदै टिकट लिएनन् ।
काँग्रेसले २०७९ मा कञ्चनपुर–३ बाट निर्वाचित रमेश लेखकलाई यस पटक टिकट दिएन् । जेनजी आन्दोलनका बेला गृहमन्त्री रहेका लेखक आन्दोलनमा भएको क्षतिका कारण आलोचित थिए । सोही कारण उनी टिकटबाट बञ्चित भए । उनको निर्वाचन क्षेत्रमा हरि बोहोराले टिकट पाएका छन् ।
थापाले २०७४ मा कैलाली–५ मा पराजित डा. आरजु राणा यस पटक चुनाव लड्न चाहन्थिन् । उनले पनि टिकट पाईनन् । उनको निर्वाचन क्षेत्रमा नरनारायण शाह मनुले टिकट पाए ।
२०७९ सालको निर्वाचनमा तेह्रथुमबाट निर्वाचित सीता गुरुङ पनि यस पटक टिकटबाट बञ्चित भईन् । उनी देशभरीमा प्रत्यक्षतर्फ एक मात्र महिला उम्मेदवार थिईन् । सुजाता कोईरालाले पनि टिकट पाईनन् । उनी मोरङ–२ बाट चुनाव लड्न चाहन्थिन् । सो निर्वाचन क्षेत्रमा मिनेन्द्र रिजालले टिकट पाए ।
सिन्धुपाल्चोक–१ का मोहनबहादुर बस्नेत, कैलाली–१ का रामजनम चौधरी, ललितपुर–३ का मदनबहादुर अमात्य, संखुवासभामा दीपक खड्का, सिन्धुली–२ मा श्याम घिमिरे, भक्तपुर–२ मा दुर्लभ थापाले पनि टिकट पाएनन् । ईश्वरी न्यौपाने, डा. रण बहादुर रावल, चिनकाजी श्रेष्ठ, राजेन्द्र बजगाई पनि यस पटक टिकटबाट बञ्चित भए । अन्तिम समयमा ओखलढुंगामा रामहरि खतिवडाको समेत टिकट काटियो ।
यसअघि जितेको कैलाली क्षेत्र नम्बर ४ मा टिकट पाएका वीरबहादुर बलायरले उम्मेदवार नबन्ने बताएपछि उनको निर्वाचन क्षेत्रमा गोरख बिष्ट(आनन्द) ले टिकट पाए ।
त्यस्तै सर्वोच्च अदालतमा बिचाराधीन रहेको पार्टीको आधिकारिता विवाद टुंगो नलागेका कारण निवर्तमान कार्यवाहक सभापति पूर्णबहादुर खड्काले नैतिकताको आधारमा टिकट नलिएको बताएका छन् । खड्का लडदै आएको सुर्खेत–१ मा उनका भाइ विष्णु खड्का उम्मेदवार बनेका छन् ।
ट्रेन्डिङ
सम्बन्धित
