सर्लाही ४ मा गगन थापाले दिए उम्मेदवारी

काठमाडौं,७ माघ ।
नेपाली कांग्रेसका सभापति गगनकुमार थापाले सर्लाही निर्वाचन क्षेत्र–४ बाट प्रतिनिधिसभा सदस्य निर्वाचनमा उम्मेदवारी दिएका छन्।

यसअघि काठमाण्डौं ४ बाट लगातार जित्दै आएका थापाले फागुन २१ गते हुने प्रतिनिधि सभाका लागि सर्लाही ४ बाट उम्मेदवारी दर्ता गरेका हुन् ।

सर्लाही–४ मा कांग्रेस सभापति थापासँगै राष्ट्रिय स्वतन्त्र पार्टीबाट डा. अमरेशकुमार सिंहले पनि उम्मेदवारी दिएका छन्।

२०६४ को पहिलो संविधानसभा सदस्य निर्वाचनदेखि नेपाली कांग्रेसबाट टिकट पाएर उम्मेदवार बन्दै आएका डा. सिंहले कांग्रेसबाट टिकट नपाएपछि २०७९ को प्रतिनिधि सभा निर्वाचनमा सोही क्षेत्रबाट स्वतन्त्र उम्मेदवारी दिएर विजयी भएका थिए।

डा. सिंह सोमबार मात्रै गत निर्वाचनमा उदाएको नयाँ दल रास्वपामा प्रवेश गरेका थिए। सर्लाही–४ बाट नेकपा एमालेले रविसिंह कुशवाहा र नेपाली कम्युनिस्ट पार्टीले डा. रगनिस राय यादवलाई उम्मेदवार बनाएको छ।

गत निर्वाचनमा पनि कांग्रेसका तत्कालीन महामन्त्री थापा सर्लाही–४ जाने चर्चा व्यापक चलेको थियो। कांग्रेसबाट टिकट नपाएपछि नेता सिंहले आफूलाई थापाले नै टिकट नदिएको आरोप लगाएका थिए ।

कांग्रेसले टिकट नदिएपछि स्वतन्त्र उम्मेदवारी दिएका सिंह २० हजार १७ मतसहित प्रतिनिधिसभा सदस्यमा निर्वाचित भएका थिए।

उनका निकटतम प्रतिद्वन्द्वी कांग्रेस उम्मेदवार नागेन्द्र कुमारले १८ हजार २५३ मत पाएका थिए । उनलाई तत्कालीन नेकपा माओवादी केन्द्र र नेकपा एकीकृत समाजवादीले सघाएका थिए।

निर्वाचनमा सर्लाही–४ का अर्का स्वतन्त्र उम्मेदवार मधुमाला कुमारी यादव १४ हजार ६२२ मत पाएर तेस्रो भएकी थिइन्। चौथो भएका जनता समाजवादी पार्टी (जसपा) नेपालका राजेशकुमार मिश्र ५ हजार ८१३ पाएका थिए।

नेता सिंह प्रवेश गरेको पार्टी रास्वपाका उम्मेदवार धिरज ठाकुर ३१८ पाएर नवौं स्थानमा आएका थिए ।