प्रधानमन्त्रीको प्रेस सल्लाहकार रावल नियुक्त
काठमाडौँ, ३० पुस । सरकारले प्रधानमन्त्री सुशीला कार्कीको प्रेस सल्लाहकारमा रामबहादुर रावललाई नियुक्त गरेको छ ।
सोमबार बसेको मन्त्रिपरिषद् बैठकले रावललाई प्रधानमन्त्री कार्कीको सल्लाहकारमा नियुक्त गर्ने निर्णय गरेको हो ।
सरकारका प्रवक्ता एवम् सञ्चार तथा सूचना प्रविधिमन्त्री जगदीश खरेलले मन्त्रालयमा आयोजित पत्रकार सम्मेलनमा सम्माननीय प्रधानमन्त्रीको प्रेस सल्लाहकारमा रामबहादुर रावल नियुक्त गर्ने निर्णय गरेको जानकारी दिए ।
यसअघि रावल प्रधानमन्त्री कार्कीको प्रेस संयोजक नियुक्त भएका थिए । नेपाल खबर डटकमका सम्पादक रावल राजीनामा दिएर प्रधानमन्त्रीको संयोजक भएका थिए ।
दृष्टि साप्ताहिकबाट पत्रकारिता शुरु गरेका रावलले नेपाल एफएम हुँदै कान्तिपुरको नेपाल म्यागजिन, कान्तिपुर टेलिभिजनमा समाचार को–अर्डिनेटर र ग्यालेक्सी फोरके टेलिभिजनको सम्पादक भएर काम गरेका थिए ।
पत्रकारिता क्षेत्रमा झन्डै दुई दशक काम गरेका रावल २०४० सालमा बाजुराको मार्तडीमा जन्मिएका हुन् ।
त्रिभुवन विश्वविद्यालयबाट स्नातकोत्तर गरेका रावलले कानुनमा समेत स्नातक गरेका छन् ।
ट्रेन्डिङ
सम्बन्धित
