Author: The Everest Post

सर्वोच्च अदालतले प्रधानमन्त्री केपी शर्मा ओलीको नेतृत्वको सरकारको वैधतामाथि प्रश्न उठाउँदै दायर भएको रिटलाई पूर्ण सुनुवाइमा पठाउने आदेश गरेको छ ।

न्यायाधीशहरू तीलप्रसाद श्रेष्ठ र श्रीकान्त पौडेलको संयुक्त इजलासले प्रधानमन्त्रीलाई समर्थन प्राप्त भएका कागजातहरू झिकाउने र अग्राधिकारसहित पूर्ण इजालासमा सुनुवाइ गर्ने आदेश गरेको हो ।

अधिवक्ता वीरेन्द्र केसीले सरकारमा सहभागी भएको दल नाउपाले सरकारलाई दिएको समर्थन फिर्ता लिइसकेको अवस्थामा प्रधानमन्त्रीले ३० दिनभित्र संसद्मा विश्वासको मत नलिएकोले सरकारको वैधानिकता सकिएको दाबी गर्दै रिट दायर गरेका थिए ।

रिट निवेदकका तर्फबाट अधिवक्ता यज्ञमणि न्यौपानेले मंगलबार बहस गरेका थिए ।

इजलासले प्रधानमन्त्री ओलीलाई समर्थन गर्ने २८ असार २०८१ को पत्र, ओलीले प्रतिनिधिसभामा विश्वासको मत लिने क्रममा समर्थन गर्ने दलहरू, नागरिक उन्मुक्ति र जसपाले दिएको समर्थनको पत्र झिकाउने आदेश गरेको हो ।

काठमाडौँ । मंगलबार नेपालमा दुई ठाउँमा भूकम्प गएको छ । राष्ट्रिय भूकम्प मापन केन्द्रका अनुसार दोलखा र गोरखा केन्द्रबिन्दु भएर भूकम्प गएको हो ।

केन्द्रका अनुसार आज दिउँसो ३ बजेर १३ मिनेट जाँदा दोलखाको लापिलाङ केन्द्रबिन्दु भएर भूकम्प गएको छ । यसको तीव्रता ४.१ म्याग्निच्युड रहेको थियो ।

त्यसैगरी, आज बिहान ६ बजेर १५ मिनेट जाँदा गोरखा अजिरकोट–३ हंशपुर आसपास केन्द्रबिन्दु भएर ४ म्याग्निच्युडको भूकम्प गएको थियो ।

काठमाडौं- राष्ट्रियसभा अन्तर्गतको विधायन व्यवस्थापन समितिले सङ्घीय निजामती सेवा विधेयक सर्वसम्मतले पारित गरेको छ ।

सिंहदरबारमा मंगलबार बसेको समिति बैठकले सर्वसम्मत रूपमा उक्त विधेयक पारित गरेको हो । बैठकमा निजामती कर्मचारीको अवकाश उमेर हदका विषयमा सहमति भएको छ ।

प्रतिनिधिसभाबाट पारित भएको विधेयकमा निजामती सेवासम्बन्धी ऐन जारी भएको पहिलो वर्ष अवकाशको उमेर ५८ वर्ष नै कायम गर्ने, दोस्रो वर्ष ५९ र तेस्रो वर्ष ६० वर्ष कायम गर्ने भन्ने व्यवस्था रहेकालाई बैठकले सदर गरेको हो ।

सबै विषयमा सहमति भएपछि समिति सभापति तुलसा कुमारी दाहालले सर्वसम्मत रूपमा विधेयक पारित भएको घोषणा गरिन् ।

उनले मंगलबार नै उक्त विधेयक राष्ट्रियसभामा पेश गर्ने र पारित गर्ने जानकारी दिइन्  ।

काठ्माण्डौँ । कर्मचारीहरूको अवकाश उमेर हद बढाउने प्रस्तावबाट सरकार पछि हटेलगत्तै निजामती सेवा विधेयकमा सहमति जुटेको छ । सङ्घीय मामिला तथा सामान्य प्रशासन मन्त्री भगवती न्यौपानेले राष्ट्रिय सभाको विधायन समितिको आजको बैठकमा प्रतिनिधि सभाबाट पारित व्यवस्थाअनुसार नै अघि बढ्न सहमत भएको बताएका हुन् ।

हिजोको बैठकमा उनले कर्मचारीहरूको अवकाश उमेर हद ऐन पारित भएको आर्थिक वर्षमै ५९ वर्ष बनाउनुपर्ने प्रस्ताव राख्नुभएको थियो । यसमा प्रतिपक्षी दलका सांसदहरूले विरोध जनाएका थिए । आजको बैठकमा मन्त्री न्यौपानेले विधेयकमा आफ्नो व्यक्तिगत कुनै स्वार्थ नरहेको र सर्वसम्मत गरेर जाने परम्परा रहेको बताए।

यसअघि प्रतिनिधि सभा र विधायन समितिमा पनि ऐन पारित भएको आर्थिक वर्षमा कर्मचारीहरूको अवकाश उमेर हद ५८ वर्ष राख्ने सहमति थियो । अब यही सहमतिअनुसार निजामती सेवा विधेयक अघि बढ्ने भएको छ । विधेयक आज राष्ट्रिय सभामा पेश गरी आजै पारित गर्ने तयारी छ ।

प्रतिनिधि सभामा छलफलपछि विधेयकले ऐनको रूप लिएर लागू भएको आर्थिक वर्षमा ५८ वर्षमा अवकाश हुने, त्यसपछिको वर्षमा ५९ वर्षमा र तेस्रो वर्षदेखि ६० वर्षमा अवकाश हुने गरी सहमति जुटेको थियो । राष्ट्रिय सभाको विधायन समितिमा पनि यही व्यवस्था राख्ने सहमति जुटेको छ ।

काठमाडौं : प्रधानमन्त्री केपी शर्मा ओली चीनको शाङ्घाई संगठन (एससीओ) प्लसको शिखर सम्मेलन सकिएसँगै बेइजिङ पुगेका छन्। ​​​​​ तियानजिनको कार्यक्रम सकाएर प्रधानमन्त्री ओलीसहितको नेपाली प्रतिनिधिमण्डल रेलमार्गबाट चीनको बेइजिङ पुगेको प्रधानमन्त्रीको सचिवालयले जनाएको छ।

चीन सरकारद्वारा बेइजिङमा आयोजना हुने फासिवादविरुद्धको विश्वयुद्ध र जापानी अतिक्रमण विरुद्धको चिनियाँ जनताको प्रतिरोधी युद्धमाथिको विजयको ८० औं वार्षिकोत्सव समारोहमा सहभागी हुन प्रधानमन्त्री ओली बेइजिङ पुगेका हुन्।

त्यहाँ प्रधानमन्त्री ओलीको चीनका उराष्ट्रपति हान चङ्गसँग भेट हुनेछ। उपराष्ट्रपति चङ्गद्वारा आयोजित रात्रिभोजमा नेपाली प्रतिनिधिमण्डल सहभागी हुने कार्यसूची छ।

प्रधानमन्त्री ओली  चीनका राष्ट्रपति सी चिनफिङको मैत्रीपूर्ण निमन्त्रणमा नेपाली प्रतिनिधिमण्डलको नेतृत्व गर्दै यही भदौ १४ गते चीन गएका हुन्।

काठमाडौँ। राष्ट्रिय सभाका सदस्य नरबहादुर विष्टले भिजिट भिसामार्फत झन्डै ४० हजार नेपाली महिलाहरूलाई कुवेतमा लगेर बेचिएको खबर आएको भन्दै सरकारको गम्भीर ध्यानाकर्षण गराएका छन्।

सोमबारको राष्ट्रिय सभा बैठकमा बोल्दै सांसद विष्टले मानव बेचबिखनको यो घटनामा अध्यागमन विभागका कर्मचारीसमेत संलग्न रहेको दाबी गरे। उनले भने, “भिजिट भिसामा कुवेत जाने महिलाहरूले अध्यागमन विभागका कर्मचारीहरूलाई एक लाख रुपैयाँ बुझाउने गरेको पाइएको छ।”

सांसद विष्टले ती महिलाहरू अहिले कुवेतमा एउटै घरमा बन्धकको रूपमा रहेको र उद्धारका लागि आग्रह गरिरहेको बताए। उनले सरकार र गृह मन्त्रालयले यसबारेमा सदनमा आएर स्पष्ट जानकारी दिनुपर्ने माग गर्दै सरकारको जवाफ माग गरेका छन्।

काठमाडौं : अविरल वर्षा र बाढीपहिरोका कारण देशभरका १० राजमार्ग पूर्ण रूपमा बन्द भएका छन् भने १५८ राजमार्ग आंशिक रूपमा मात्रै सञ्चालनमा छन्। सडक विभागका अनुसार कतै बाढीले सडक कटान गरेको छ भने कतै भीषण पहिरो खसेपछि आवागमन नै ठप्प भएको छ।

कार्यवाहक प्रधानमन्त्री तथा सहरी विकासमन्त्री प्रकाशमान सिंहले आइतबार सडक अवरुद्ध अवस्थाबारे बैठक बोलाएर तत्काल सडक खुलाउने निर्देशन दिएका छन्। नागरिकलाई आवतजावतमा सहजता दिलाउन सबै निकायलाई सक्रिय हुन आग्रह गर्दै उनले ढिलाइ नगरी काम अगाडि बढाउन आदेश दिएका हुन्।

भौतिक पूर्वाधार तथा यातायात मन्त्रालयका प्रवक्ता भिमार्जुन अधिकारीका अनुसार धेरै खण्डमा पहिरो पन्छ्याउने र बाटो मर्मतको काम भइरहेको छ तर लगातारको वर्षा र नदीमा बढ्दो बहाबले कार्य अवरुद्ध भएको छ। कतिपय ठाउँमा एक्साभेटर र लोडर परिचालन गरी बाटो खोल्ने प्रयास भइरहेको छ भने कतै अझै पानी घटेपछि मात्र सफाइ सुरु गर्न सकिने अवस्था छ।

पूर्ण अवरुद्ध भएका राजमार्गमध्ये ठोरी-भण्डारा-मलेखु, गल्छी-त्रिशूली-वेत्रावती-मैलुङ-स्यफ्रुबेंसी-रसुवागढी सडकखण्ड चीनतर्फबाट आएको बाढीले सडक कटान गरेपछि बन्द भएको छ। जमुनाहा-नेपालगञ्ज-कोहलपुर-सुर्खेत-खुलालु-हिल्सा जाने कर्णाली राजमार्ग पैमा खोलाको बहाब बढ्दा रोकिएको छ। त्यसैगरी कोशी राजमार्ग पनि अवरुद्ध छ, बरुण नदीमा डाइभर्सन बगाएको र पुल निर्माण अधूरो भएकाले आवतजावत ठप्प भएको विभागले जनाएको छ। तमोर करिडोरमा पाँच वर्षअघि बनेको रानी पुल साउनको बाढीले बगाएपछि सम्पूर्ण आवागमन रोकिएको छ।

छिन्चु-कुदु हुँदै जाजरकोट-दुनै-धो-तिन्जे-मरिम जाने भेरी करिडोर पहिरो र बाढीले ढाकेको छ भने कोइलाबास-लमही-अर्जुनखोला-घोराही-होलेरी-घर्तीगाउँ-थवाङ-लुकुम जोड्ने सहिद मार्ग पनि लगातारको वर्षा र पहिरोले पूर्ण रूपमा बन्द भएको छ। यस्तै सुर्खेत–डुङ्गेश्वर–सातखम्बा–दुल्लु–पिपलकोट–खुलालु हुँदै नाग्मा–जुम्ला जोड्ने सडकमा ठूलो पहिरोसहित ठूला ढुङ्गा खसेपछि आवतजावत बन्द भएको छ। विभागका अनुसार लगातार सुख्खा पहिरो खसिरहेकोले राति सडक बन्द गर्नुपरेको र दिउँसो मात्र सवारी संचालन गरिने प्रयास भइरहेको छ।

सडक विभागले पानी पर्न रोकिएपछि र नदीको बहाब घटेपछि अवरुद्ध खण्डहरू खोल्ने प्रयासलाई तीव्रता दिने जनाएको छ। हाल अस्थायी रूपमा सफाइ, डाइभर्सन र बेलीब्रिज निर्माण गर्ने काम अघि बढाइएको छ।

काठमाडौ ।  भाद्र शुक्ल पूर्णिमाका दिन यही भदौ २२ गते आइतबार खग्रास (पूरै ढाकिने) चन्द्रग्रहण लाग्ने नेपाल पञ्चाङ्ग निर्णायक विकास समितिले जनाएको छ ।

ग्रहणले भदौ २२ गते राति १० बजेर ११ मिनेटमा स्पर्श गर्ने समितिले स्वीकृति दिएको पात्रो (पञ्चाङ्ग) मा उल्लेख छ । राति ११ः५६ मा चन्द्रग्रहणको मध्य हुनेछ । राति ०१ः४१ बजे ग्रहण सकिने समितिका पूर्वअध्यक्ष प्रा श्रीकृष्ण अधिकारीले जानकारी दिए । साढे तीन घण्टा काठमाडौँबाट चन्द्रग्रहण देखिने पनि उनले सुनाए ।

यो ग्रहण विसं २०८२ को पहिलो ग्रहण हो । यसै वर्ष आगामी फाल्गुन शुक्ल पूर्णिमामा पनि खण्डग्रास चन्द्रग्रहण लाग्ने समितिले जनाएको छ । ग्रहणमा बालबालिका, वृद्धवृद्धा र बिरामीबाहेकलाई शास्त्रीय रूपमा भोजन निषेध गरिएको पनि उनले सुनाए । भदौ २२ गते आइतबार दिउँसो १३ः११ बजेपछि बाल, वृद्ध र आतुर बाहेकले भोजन गर्नु हुँदैन । चन्द्रग्रहण पूर्णिमा र सूर्यग्रहण औँसी तिथिमा लाग्ने गर्छ ।

वीरगञ्ज । गृहमन्त्री रमेश लेखकले लिम्पियाधुरा, कालापानी र लिपुलेक नेपालकै भूमि भएकाले यसमा छिमकी मित्रराष्ट्रहरुले चित्त दुखाउनुनपर्ने बताएका छन्।

नेपाल प्रेस युनियन पर्साले आज यहाँ आयोजना गरेको पत्रकार सम्मेलनमा गृहमन्त्री लेखकले छिमेकी राष्ट्र भारत र चीनले नेपालको भूमि लिपुलेकलाई द्विपक्षीय व्यापारिक नाका बनाउने गरी गरेको सम्झौतालाई लक्षित गर्दै प्रधानमन्त्री केपी शर्मा ओलीले जनाएको आपत्ति सही भएको बताए।

“ लिम्पियाधुरा, कालापानी र लिपुलेक भूमि नेपालको हो । हामीले हाम्रो भूमिलाई हाम्रो भूमि हो भन्दा कुनै पनि देशसँग हाम्रो सम्बन्ध बिग्रिनुपर्ने कारण छैन,” उनले भने, “यसमा मित्रराष्ट्र भारत र चीनले पनि चित्त दुखाउनुपर्ने कुनै कुरा छैन । त्यो भूमि हाम्रो हो । यसमा हामी प्रष्ट छौंँ ।”

गृहमन्त्री लेखकले प्रधानमन्त्री ओली चीन गएको अवस्थामा मित्रराष्ट्र भारत र चीनसँग हाम्रो भूमिलाई लिएर भएको सम्झौतामा आपत्ति जनाउनु सही भएको स्पष्ट पार्नुभयो । नेपालको भूमि कुनै पनि राष्ट्रका विरुद्धमा प्रयोग हुन नदिने उनले स्पष्ट पारे।