मेसीले गोल गर्दै गरून्, म चाहिँ ट्रफीसहित फ्रान्स फर्कन चाहन्छु – एम्बाप्पे

काठमाडौं । विश्वकप फुटबलमा सर्वाधिक गोल गर्ने कीर्तिमानको दौडमा फ्रान्सेली सुपरस्टार किलियन एम्बाप्पे अर्जेन्टिनी कप्तान लियोनल मेस्सीको निकै नजिक पुगेका छन् । तर, एम्बाप्पेको ध्यान भने जुलाई १९ मा न्युयोर्कमा हुने फाइनलमा विश्वकपको ट्रफी उचाल्नेमा बढी केन्द्रित देखिएको छ ।

एम्बाप्पेले मंगलबार भएको अन्तिम ३२ को खेलमा स्वीडेनलाई ३-० ले पराजित गर्ने क्रममा दुई गोल गरे । यो दुई गोलसँगै उनी मेस्सीको नाममा रहेको विश्वकपको सर्वाधिक १९ गोलको कीर्तिमानभन्दा मात्र एक गोलले मात्र पछि छन् । जारी विश्वकपमा दुवै खेलाडी ६-६ गोलसहित उच्च गोलकर्ताको सूचीमा शीर्ष स्थानमा छन् ।

विश्वकपका १८ खेलमा १८ नै गोल गरिसकेका एम्बाप्पेले पत्रकारहरूसँग कुरा गर्दै आफ्नो प्राथमिकता स्पष्ट पारे, ‘मैले पहिले पनि भनेको थिएँ, हाम्रो लक्ष्य भनेको सकेसम्म अगाडि बढ्नु हो । हाम्रो योजना जुलाई १९ को फाइनल खेल्नु हो र ट्रफी उचाल्नु हो ।’

उनले अगाडि थपे, ‘पक्कै पनि तपाईँले जति धेरै गोल गर्नुहुन्छ, गोलकर्ताको सूचीमा त्यति नै माथि पुग्नुहुन्छ, यो सबैलाई थाहा भएकै कुरा हो । तर मलाई विश्वास छ, लियो (मेस्सी)ले अझै गोल गर्नेछन्, त्यसैले म कीर्तिमानको पछि धेरै लाग्दिनँ । मेरो ध्यान हामीले सामना गर्ने प्रतिद्वन्द्वी र हाम्रो फाइनलको लक्ष्यमा मात्र केन्द्रित छ ।’

मेस्सीको अर्जेन्टिनाले शुक्रबार कमजोर मानिएको केप भर्डको सामना गर्दैछ । फ्रान्सले क्वार्टरफाइनलमा स्थान बनाउन अब पाराग्वेसँग खेल्नुपर्नेछ । यो खेल जित्ने टोलीले सेमिफाइनल प्रवेशका लागि आयोजक क्यानडा वा मोरक्कोमध्ये एकसँग प्रतिस्पर्धा गर्नेछ ।

एम्बाप्पेले आगामी कुनै पनि खेललाई हल्का रूपमा नलिने बताए ।उनले टोलीमा अझै सुधार गर्नुपर्ने पक्षहरू रहेको समेत स्वीकार गरे ।

‘हामी पाराग्वेविरुद्धको खेलअघि केही कुरामा अझै मिहिनेत गर्नेछौँ । मैदानमा केही तालमेलहरू मिल्न अझै आवश्यक छ,’ उनले भने ।