५ वर्ष नाघेका मुद्दा शुन्यमा झार्ने लक्ष्यमा नवयुवाको अवरोध : न्यायाधीश पौडेल

काठमाण्डौ- सर्वोच्च अदालतका न्यायाधीश महेश शर्मा पौडेलले पाँच वर्ष नाघेका मुद्दाहरूलाई छिटो किनारा लगाउने अदालतको लक्ष्यमा नवयुवाको आन्दोलनले चुनौती थपेको बताएका छन् ।

गएको वर्ष आठ वर्ष पुराना मुद्दाहरू फछर्यौट गरी उल्लेख्य प्रगति गरेको अदालतले यस वर्ष पाँच वर्ष नाघेका मुद्दाहरूलाई शुन्यमा झार्ने लक्ष्य लिएको थियो । तर  भदौ २३ र २४ गतेका घटना र त्यसपछिको परिस्थितिले लक्ष्य प्राप्तिमा अवरोध पुगेको न्यायाधीश पौडेलले बताए ।

उनले प्रतिकूल परिस्थितिका बाबजुद पनि  आगामी दिनमा कार्यसम्पादन बढाएर लक्ष्य प्राप्ति गर्ने प्रतिवद्धता समेत व्यक्त गरे । न्यायाधीश पौडेलले न्यायालय सधैँ स्वतन्त्र न्यायपालिकाको हिमायती रहेको र रहने स्पष्ट पारे ।

यो  कठिन अवस्था नआएको भए असार मसान्तसम्म ५ वर्ष नाघेको कुनै पनि मुद्दा बाँकी नरहने उनले उल्लेख गरेका छन् । अस्वाभाविक रूपमा भदौ २४ गतेको घटनापछि मिसिलसम्बन्धी उत्पन्न परिस्थितिले न्यायलयलाइै  निकै पछाडि धकेलेको र यो वर्ष मुद्दाको सङ्ख्या पनि बढ्न सक्ने उनले बताए ।

अदालतले न्याय सम्पादनलाई शिघ्र र प्रभावकारी बनाउन प्रयास जारी राखेको बताउँदै उनले परिस्थितिलाई बुझिदिन आम जनसमुदायलाई आग्रह समेत गरे ।

उनले सञ्चारमाध्यमलाई न्यायपालिकाको आवाज जनमानसमा पु¥याउने सहयात्री र परिपूरकका रूपमा चित्रण गरे । पछिल्लो समय चर्चामा रहेको ‘मिडिया ट्रायल’ र समाचार संप्रेषणको सीमाका सम्बन्धमा उनले सर्वोच्च अदालतबाट भएका विभिन्न फैसलाहरूले यसको परिधि स्पष्ट पारिसकेको बताए ।