बर्डफ्लु भाइरसको आनुवंशिक संरचना पहिचान गर्ने प्रक्रिया सुरु

काठमाण्डौ- बर्डफ्लुको संक्रमण तीव्र बनेपछि सरकारले भाइरसको आनुवंशिक संरचना पहिचान गर्ने काम सुरु गरेको छ । ११ वटा जिल्लाको ८२ ठाउँमा संक्रमण पुष्टि भइसकेकोमा फैलने क्रम तीव्र बनेपछि सङ्क्रमित भाइरसमा आनुवंशिक परिवर्तन भए-नभएको थाहा पाउन राष्ट्रिय जनस्वास्थ्य प्रयोगशालासँगको सहकार्यमा जिन विश्लेषण सुरु गरिएको पशुसेवा विभागले जनाएको छ ।

काठमाण्डौ उपत्यकामा देखिएको भाइरसको नमुनाबाट यो विश्लेषण भइरहेको विभागले जनाएको छ । यसबाट भाइरस कस्तो किसिमको र कहाँबाट आएको हो भनी पत्ता लगाइन्छ । नयाँ भेरियन्ट भएमा थप संक्रामक हुन सक्ने भएकाले खोप र उपचार विधिमा पनि सुधार आवश्यक पर्न सक्छ ।

काठमाण्डौ, ललितपुर, भक्तपुर तथा काभ्रेका केही क्षेत्रमा संक्रमण अझै देखिइरहेकाले विशेष निगरानी बढाएको विभागका महानिर्देशक डा.उमेश दाहालले जानकारी दिए ।

विभागले पन्छीपालक किसानलाई फार्ममा जैविक सुरक्षाको मापदण्ड कडाइका साथ पालना गर्न, पुराना अण्डाका क्रेट पुनःप्रयोग नगर्न, ढुवानीका साधन पूर्ण निसङ्क्रमण गरेर मात्र फार्मभित्र प्रवेश गराउन तथा जङ्गली पन्छीसँग घरपालुवा पन्छीको सम्पर्क हुन नदिन आग्रह गरेको छ ।

साथै पन्छी तथा पन्छीजन्य उत्पादनको ओसारपसार गर्दा भेटेरिनरी प्रमाणपत्र अनिवार्य लिन, नियमित खोप लगाउन तथा फार्ममा अस्वाभाविक रूपमा धेरै पन्छी बिरामी वा मरेको देखिए तत्काल नजिकको पशुसेवा कार्यालयमा जानकारी गराउन विभागले अनुरोध गरेको छ ।