रवि लामिछाने फर्केको भोलिपल्ट भारत जाँदै परराष्ट्रमन्त्री खनाल

काठमाडौं । परराष्ट्रमन्त्री शिशिर खनाल शनिबार (जेठ २३) भारत जाने भएका छन् । उनी तीन दिनका निम्ति भारत जान लागेका हुन् ।

सत्तारूढ दल राष्ट्रिय स्वतन्त्र पार्टी (रास्वपा)का सभापति रवि लामिछाने पाँचदिने भारत भ्रमण सम्पन्न गरेर फर्केको भोलिपल्ट परराष्ट्रमन्त्री खनाल नयाँ दिल्ली जान लागेका हुन् । भारतीय विदेशमन्त्री एस जयशंकरको औपचारिक निमन्त्रणामा खनाल नयाँ दिल्ली जान लागेका परराष्ट्र मन्त्रालय स्रोतले जनाएको छ ।

भारत भ्रमणमा रहँदा खनाल द्विपक्षीय प्रतिनिधिमण्डलस्तरीय बैठकमा सहभागी हुनेछन् । उनले भारतका प्रधानमन्त्री नरेन्द्र मोदीसँग पनि शिष्टाचार भेटवार्ता गर्ने कार्यक्रम छ ।

हाल रास्वपा सभापति लामिछाने भारत भ्रमणमा छन् । उनी शुक्रबार (जेठ २२) स्वदेश फर्कनेछन् ।

भारतमा लामिछानेलाई उच्च सम्मान दिइएको छ । उनले भारतीय प्रधानमन्त्री नरेन्द्र मोदी, विदेशमन्त्री एस जयशंकर र गृहमन्त्री अमित शाहसँग भेटवार्ता गरेका छन् ।