महेश बस्नेतले पनि मागे गृहमन्त्रीको राजीनामा

नेकपा एमालेका सचिव महेश बस्नेतले गृहमन्त्री सुधन गुरुङको तत्काल राजीनामा माग गरेका छन्।

व्यवसायी दीपक भट्टसँग जोडिएको ‘स्टार माइक्रो इन्स्योरेन्स’ कम्पनीमा गृहमन्त्रीको सेयर रहेको कागजात सार्वजनिक भएपछि चौतर्फी राजीनामा र छानबिनको माग उठिरहेका बेला बस्नेतले पनि सामाजिक सञ्जालमार्फत् राजीनामाका लागि जोड दिएका हुन्।

गृहमन्त्री गुरुङ र भट्टबीच २५ लाख रुपैयाँ बराबरको शेयर स्वामित्वसहितको सम्बन्ध देखिएको दाबी गर्दै सचित बस्नेतले छानबिनका लागि पदबाट बाहिरिनुपर्ने बताएका हुन्।

यसअघि मिडिया र बालेन शाहका समर्थकहरूले भट्टको नाम नेकपा एमालेका अध्यक्ष केपी शर्मा ओली, नेकपा स‌ंयोजक पुष्पकमल दाहाल ‘प्रचण्ड’ र नेपाली कांग्रेसका पूर्व सभापति शेरबहादुर देउवासँग जोडेर बदनाम गर्न खोजेको बस्नेतको आरोप छ। यद्यपि, अनुसन्धानका क्रममा ती नेताहरूको कुनै संलग्नता नदेखिएको उनको जिकिर छ।

सचिव बस्नेतले गृहमन्त्री गुरुङ बालेन शाह निकटका व्यक्ति भएको उल्लेख गर्दै लेखेका छन्, ‘दीपकजीको कनेक्सन त बालेनजीकै निकट मानिएका गृहमन्त्री सुधन गुरुङसँग नै २५ लाख रुपैयाँ बराबरको शेयरसहित रहेको तथ्य बाहिरियो।’

उनले कार्की आयोगका सदस्य विज्ञान राज शर्माको नाममा समेत १० लाख रुपैयाँ बराबरको शेयर फेला परेको दाबी गरेका छन्।

व्यवसायी भट्ट दोषी भए वा नभएको निर्णय न्यायालयले गर्ने उल्लेख गर्दै बस्नेतले गृहमन्त्रीले तत्काल राजीनामा दिएर छानबिनको दायरामा आउनु आवश्यक रहेको बताए। बस्नेतले गृहमन्त्री गुरुङलाई पद नत्यागे गम्भीर परिणाम भोग्नुपर्ने चेतावनी समेत दिएका छन्।

गृहमन्त्रीको आपराधिक पृष्ठभूमिका कारण ढिलो–चाँडो पद जाने निश्चित रहेको जिकिर समेत सचिव बस्नेतले गरेका छन्।