मैले सेयर किन्न प्रयोग गरेको रकम ऋणको हो : गृहमन्त्री गुरूङ

गृहमन्त्री सुधन गुरूङले आफूमाथि उठेको लगानीको स्रोतबारे स्पष्टीकरण दिएका छन्।

सोमबार सामाजिक सञ्जाल फेसबुकबाट उनले आफ्नो दुई करोड ७५ लाख शेयर कारोबारबारे उठेको प्रश्नको जबाफ दिएका हुन्।

‘स्रोतको कुरा- मैले लगानी गरेको रकम ऋण (कर्जा) मार्फत जुटाइएको हो, र त्यसको लिखित तमसुक मिति २०८०/०५/२९ को हो, जुन रेकर्डमा नै छ। उक्त तमसुकअनुसार ऋण लिइएको रकम बैंकिङ च्यानलमार्फत आएको छ र सोही रकम लगानीमा प्रयोग गरिएको हो,’ उनले लेखेका छन्।

उनले पैसा कहाँबाट आयो भन्नेकुरा बैंकको रेकर्ड र कागजातबाट देखिने पनि बताए।

त्यसैगरी उनले अहिले सम्पत्ति शुद्धीकरण अनुसन्धान विभागको हिरासतमा रहेका दीपक भट्टसँगको व्यवसायिक साझेदारीबारे पनि खुलाएका छन्। उनले सेयर किन्दैमा साझेदारी नहुने बताए।