सांसदको शपथका लागि आवश्यक तयारी पूरा

काठमाडौं– संघीय संसद सचिवालयले प्रतिनिधिसभा सदस्यहरूको शपथ र सभाका प्रारम्भीक बैठकका लागि आवश्यक तयारी पूरा गरेको जनाएको छ । मंगलबार सिंहदरबारमा निर्माण भइरहेको संसद भवनको हालसम्मको तयारीबारे सञ्चारकर्मीलाई जानकारी गराउँदै संसद सचिवालयले शपथ र सभाका प्रारम्भीक बैठकका लागि बहुउद्देश्यीय हलमा आवश्यक सम्पूर्ण तयारी गरिएको जनाएको हो ।

सचिवालयका अनुसार प्रतिनिधिसभाको मुख्य हल निर्माण नभएका कारण बहुउद्देश्यीय हलमा नै प्रारम्भीक चरणका बैठकहरू बस्ने छन् । त्यसका लागि सिटहरु, रोष्टम, सभामुख आसन, महासचिव, सचिव, सचिवालय बस्ने ठाउँ लगाएतको व्यवस्थापन भइरहेको संघीय संसदका प्रवक्ता एकराम गिरीले जानकारी दिए।

उनले बहुउद्देश्यीय हल नजिकै नयाँ भवनमा नै कार्य व्यवस्था शाखा, कार्यव्यवस्था परामर्श समितिको हल र सभामुख बस्ने कोठाको पनि व्यवस्थापन गरिएको उल्लेख गरे। प्रवक्ता गिरीले नयाँ संसद भवनको निर्माणको अवस्था हेर्दा शपथपछि संसदको पहिलो अधिवेशनको सबै बैठकहरू बहुउद्देश्यीय हलमा नै हुने देखिएको बताए।

उनले बहुउद्देश्यीय हलबाट बैठक सञ्चालन गर्नुपर्दा निकै जटिलताहरु देखा पर्ने भएकाले छिटो भन्दा छिटो संसद भवनको निर्माण कार्य सम्पन्न गर्न सम्बन्धित निकायलाई अनुरोध गरिरहेको बताए । नवनिर्वाचित प्रतिनिधिसभा सदस्यहरूको शपथ यहि चैत्र १२ गते बहुउद्देश्यीय हलमा नै हुने संसद सचिवालयले जनाएको छ ।