इरानसँगको सैन्य कारबाही अस्थायी रुपमा स्थगित : ट्रम्प

अमेरिकी राष्ट्रपति डोनाल्ड ट्रम्पले इरानसँगको सैन्य कारबाही अस्थायी रुपमा स्थगित भएको बताएका छन् । अमेरिका र इरानबीच पछिल्ला दुई दिनमा अत्यन्त सकारात्मक र उपलब्धिमूलक वार्ता भएको उनले जानकारी दिए।

मध्यपूर्वमा जारी तनाव समाधान गर्ने उद्देश्यले दुवै देशबीच गहन र रचनात्मक संवाद भइरहेको उनले बताए।

ट्रम्पका अनुसार यी वार्ताहरू विस्तृत, गहिरो र सहमतितर्फ उन्मुख रहेका छन् र आगामी दिनहरूमा पनि निरन्तर जारी रहनेछन्। वार्ताको सकारात्मक वातावरणलाई ध्यानमा राख्दै उनले अमेरिकी रक्षा निकायलाई इरानका ऊर्जा संरचना र विद्युत् केन्द्रहरूमाथि गर्ने भनिएका सबै सैन्य आक्रमणहरू पाँच दिनका लागि स्थगित गर्न निर्देशन दिएका छन्।

उनले यो निर्णय जारी वार्ता सफल हुने अपेक्षामा आधारित रहेको स्पष्ट पारेका छन्। वार्ताले सकारात्मक नतिजा ल्याए क्षेत्रीय तनाव कम हुने र दीर्घकालीन समाधानको बाटो खुल्ने ट्रम्पकाे विश्वास छ।

मध्यपूर्वमा पछिल्लो समय बढ्दो तनावबीच अमेरिका-इरानबीचको यो संवादलाई अन्तर्राष्ट्रिय समुदायले महत्वपूर्ण रूपमा हेरिरहेको छ।