कञ्चनपुर कारागारमा थुनुवाबिच कुटाकुट, एक जना घाइते

कञ्चनपुर। कञ्चनपुर जिल्ला कारागारभित्र थुनुवाहरूबिच आपसी विवाद हुँदा एक जना घाइते भएका छन् । कारागारको आन्तरिक विवादका क्रममा चिर्पट प्रहार हुँदा वेदकोट नगरपालिका–९ का गणेश विष्ट घाइते भएका हुन् ।

जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक (डीएसपी) हेमबहादुर शाहीका अनुसार लागूऔषध मुद्दामा पुर्पक्षका लागि थुनामा रहेका विष्टमाथि अर्का थुनुवा भुवन ऐरले आक्रमण गरेका थिए ।

कारागारको ब्लक ‘ए’ मा रहेका विष्टमाथि ब्लक ‘बी’ मा रहेका शुक्लाफाँटा नगरपालिका–९ का ऐरले चिर्पट प्रहार गरेको प्रहरीले जनाएको छ । आक्रमण गर्ने ऐर पनि लागूऔषध सम्बन्धी मुद्दामै थुनामा रहेका व्यक्ति हुन् ।

चिर्पट प्रहारबाट चोट लागेका विष्टको महाकाली प्रादेशिक अस्पतालमा उपचार भइरहेको छ । उनको स्वास्थ्य अवस्था अहिले सामान्य र खतरामुक्त रहेको अस्पताल स्रोतले जनाएको छ । कारागारभित्र भएको यो झडपको कारणबारे प्रहरीले थप अनुसन्धान गरिरहेको छ ।