फाप्ला रंगशाला प्रदेश सरकारको प्राथमिकतामा: मुख्यमन्त्री शाह

धनगढी- सुदूरपश्चिम प्रदेशका मुख्यमन्त्री कमलबहादुर शाहले फाप्ला अन्तर्राष्ट्रिय क्रिकेट रंगशाला तथा खेलग्राम निर्माण प्रदेश सरकारको विशेष प्राथमिकतामा रहेको बताएका छन् ।

शनिबार फाप्ला अन्तर्राष्ट्रिय क्रिकेट रंगशाला तथा खेलग्राम निर्माण समितिका अध्यक्ष सुवास शाहीसँग भएको भेटमा मुख्यमन्त्री शाहले परियोजनाको हालसम्मको प्रगति र तयारीबारे जानकारी लिँदै प्रदेश सरकार निर्माण कार्यमा सक्दो सहयोग गर्न प्रतिबद्ध रहेको बताएका हुन् ।

मुख्यमन्त्री शाहले फाप्लालाई सुदूरपश्चिमको ‘गेम चेन्जर’ परियोजनाका रूपमा उल्लेख गर्दै यसको निर्माणलाई उच्च प्राथमिकतामा राखिएको र आगामी आर्थिक वर्षमा आवश्यक बजेट विनियोजन गर्ने बताए । साथै, संघीय सरकारसँग पनि आवश्यक समन्वय र पहल गरिने उनले बताए ।

भेटका क्रममा अध्यक्ष शाहीले परियोजनाको हालसम्मको प्रगति विवरण प्रस्तुत गर्दै आगामी बजेटमा प्रदेश सरकारले प्राथमिकता दिनुपर्ने बताए । धनगढीमा निर्माणाधीन खेलग्रामको विस्तृत परियोजना प्रतिवेदन (डीपीआर) तथा वातावरणीय प्रभाव मूल्यांकन (इआईए) सम्पन्न भइसकेको छ ।

परियोजनाको पहिलो चरणका लागि करिब ११ अर्ब रुपैयाा बजेट आवश्यक पर्ने अध्यक्ष शाहीले जानकारी दिए। उनले यस्ता ठूला पूर्वाधार आयोजनामा संघ, प्रदेश र स्थानीय तहबीच समन्वय आवश्यक रहेको उल्लेख गर्दै खेलकुद क्षेक्रमा विगतजस्तो टुक्रे बजेट विनियोजन नगरी दीर्घकालीन प्रभाव पार्ने परियोजनामा लगानी गर्नुपर्ने धारणा राखे । देशकै हित हुने गरी फाप्लाजस्ता ठूला परियोजनामा तीनै तहका सरकारको लगानी आवश्यक रहेको उनको भनाइ छ ।