कुवेतमा अमेरिकी सैन्य विमानहरू खसालियो

अमेरिका- इरान र इजरायलबीचको बढ्दो सैन्य मुठभेडले खाडी क्षेत्रको सुरक्षा अवस्था गम्भिर बन्दै गएको छ ।   शनिबार अमेरिका र इजरायलले इरानमाथि गरेको भीषण आक्रमणपछि यस क्षेत्रमा युद्धको बादल मडारिएको छ । विशेष गरी इरानका सर्वोच्च नेता आयतुल्लाह अली खामेनीको मृत्युको खबरले क्षेत्रीय शक्ति सन्तुलनमा हलचल पैदा गरेको छ ।

कुवेतको रक्षा मन्त्रालयले सोमबार ‘धेरै’ अमेरिकी सैन्य विमानहरू दुर्घटनाग्रस्त भएको जनाएको छ र ‘सबै चालकदल सुरक्षित’ रहेको बताएको छ । सीएनएनद्वारा भौगोलिक रूपमा पुष्टि गरिएका भिडियोहरूमा कुवेतमा एक लडाकु विमान खसिरहेको र एक पाइलट प्यारासुटमार्फत जमिनमा झर्दै गरेको देखिएको छ ।

इरानका उच्च अधिकारीले तेहरानले अमेरिकासँग ‘वार्ता नगर्ने’ बताएका छन् । दुबई, अबुधाबी र दोहा जस्ता खाडी सहरहरूमा विष्फोटको आवाज सुनिएको छ, जबकि इजरायल र हिज्बुल्लाहबीच आक्रमण–प्रत्याक्रमण जारी छ र द्वन्द्व फैलिँदै गएको छ ।

यस्तै राष्ट्रपति डोनाल्ड ट्रम्पले कुवेतमा तीन अमेरिकी सैनिकको मृत्यु भइसकेको पुष्टि गर्दै अझ धेरै अमेरिकी हताहती हुन सक्ने बताएका छन् । युद्धका कारण हवाई यात्रा अवरुद्ध भएको छ, सामान्यतया सुरक्षित मानिने अमेरिकामैत्री खाडी राष्ट्रहरू प्रभावित भएका छन् र तेल आपूर्ति प्रभावित भएको छ । आफ्ना नागरिकलाई उद्धार गर्न खोजिरहेका देशहरूले पनि ठूलो चुनौती सामना गरिरहेका छन्।

साउदी अरेबियाले शीर्ष तेल रिफाइनरीमा लक्षित दुई ड्रोन खसाल्यो
यस्तै साउदी अरेबियाको रक्षा मन्त्रालयका प्रवक्ता तुर्की अल–माल्कीका अनुसार रस तनुरा तेल रिफाइनरीलाई लक्षित गरी पठाइएका दुई ड्रोनलाई अवरोध गरी नष्ट गरिएको छ । रस तनुरा रिफाइनरी साउदी अरेबियाको सबैभन्दा ठूलोमध्ये एक हो, जसको दैनिक उत्पादन क्षमता पाँच लाख ५० हजार ब्यारेल छ ।

इरानमा सयौंको मृत्यु भएको रेड क्रिसेन्टको दाबी
शनिबारदेखि सुरु भएका संयुक्त अमेरिकी–इजरायली आक्रमणपछि इरानमा कम्तीमा ५५५ जनाको मृत्यु भएको इरानी रेड क्रिसेन्ट सोसाइटीले जनाएको छ । इरानी सरकारी सञ्चारमाध्यमले रेड क्रिसेन्टलाई उद्धृत गर्दै १३१ सहरमा आक्रमण भएको बताएका छन् । इरानी संसद सदस्य मोहम्मद बेइगीले नौं वटा अस्पताल गम्भीर रूपमा क्षतिग्रस्त भएको दाबी गरेका छन् । आइतबारका आक्रमणमा केही बिरामीहरू घाइते भएको उनले बताएका छन् ।