निर्वाचन प्रचारका नाममा भित्तेलेखन गरे २५ हजार जरिवाना

निर्वाचन आयोगले निर्वाचन प्रचारप्रसारका क्रममा कुनै पनि उम्मेदवार वा राजनीतिक दलका पक्षमा भित्तेलेखन गर्न नहुने बताएको छ।  विभिन्न स्थानमा निर्वाचन प्रचारका लागि भित्तामा लेख्न थालिएको भन्दै आयोगले यस्तो कार्य नगर्न आग्रह गरेको हो।

आयोगका अनुसार भित्तेलेखन लगायत आचारसंहिता उल्लंघन गर्ने व्यक्तिलाई आयोग, निर्वाचन अधिकृत वा अनुगमनकर्ताले अधिकतम २५ हजार रुपैयाँसम्म जरिवाना गर्न सक्ने जनाएको छ ।  आयोगले तोकेको आकार र रङ्गको सामान्य पर्चा वितरण गर्न बाहेक कुनै प्रकारका पोस्टर, भित्तेलेखन, ब्यानर, डिजिटल डिस्प्ले छाप्न, प्रयोग गर्न वा गराउन नपाइने जनाएको छ।

त्यसैगरी धार्मिक, पुरातात्त्विक, ऐतिहासिक, सरकारी, सार्वजनिक वा निजी भवन, स्मारक, पर्खाल वा अन्य संरचनामा कुनै पर्चा टाँस्न वा लेख्न पनि निषेध गरिएको छ। निर्वाचन प्रचारका लागि आयोजना गरिने सभा वा भेलाबाहेक अन्य स्थानमा साउण्ड सिस्टम प्रयोग गर्न नपाइने समेत आयोगको भनाई छ ।

यस्तैगरी मतदान हुने दिनभन्दा ४८ घण्टा अघिदेखि मतगणना सम्पन्न नभएसम्म कुनै उम्मेदवार वा राजनीतिक दलको पक्ष वा विपक्षमा सभा, जुलुस, नाराबाजी वा अन्य कुनै प्रकारको प्रचारप्रसार गर्न प्रतिबन्ध लगाइएको छ।

उम्मेदवार, निर्वाचन प्रतिनिधि वा अन्य कुनै व्यक्तिले आयोगको मर्यादामा प्रतिकूल असर पर्ने गरी प्रचारप्रसार गर्न नहुने पनि आयोगले स्पष्ट पारेको छ।