नेपाल र चीनबीच सीमापार भुक्तानी सहज गरिने
काठमाडौँ : नेपाल र चीनबीच सीमापार भुक्तानीलाई सहज गरिने भएको छ । यस विषयमा राष्ट्र बैंकका गभर्नर विश्वनाथ पौडेल र पिपुल्स बैंक अफ चाइना (पीबीओसी) का गभर्नर फान कोङसङबीच छलफल भएको हो ।
‘अन्तर्राष्ट्रिय भुक्तानी बैंक’द्वारा चीनको थिआनचिनमा आयोजित बैकिङ सुपरिवेक्षणसम्बन्धी २०औं एसिया–प्रशान्त उच्चस्तरीय बैंठक’को अवसरका गभर्नरद्वयबीच भेटवार्ता भएको थियो । भेटमा गभर्नरद्वयबीच अन्तरदेशीय भुक्तानी सहजीकरण, लगानी तथा सहयोग आदानप्रदानका क्षेत्रका अवसर र चुनौतीलगायत विषयमा छलफल भएको थियो ।
भेटका क्रममा वित्तीय क्षेत्रका उदीयमान अभ्यास, नवप्रवर्तन र प्रविधिको विकासबाट हुने लाभ, र समसामयिक विषयमा दुईपक्षीय सहयोग आदानप्रदानका विषयमा गभर्नरद्वयबीच छलफल भएको थियो । यसका अतिरिक्त दुवै मुलुकका नागरिकको भ्रमणका क्रममा क्यूआर कोडमार्फत हुने भुक्तानीको सहजीकरण तथा लागत न्यूनीकरण गर्ने विषयमा समेत छलफल भएको राष्ट्र बैंकले बताएको छ ।
सो अवसरमा पीबीओसीका गभर्नर फानले विद्युतीय भुक्तानी कारोबारको आधुनिकीकरण, सहयोग आदानप्रदान र सहकार्यका लागि चिनियाँ केन्द्रीय बैंक तयार रहेको धारणा राखेका थिए ।
चीन भ्रमणका क्रममा गभर्नर पौडेलले दुई केन्द्रीय बैंकबीच सहकार्य, समन्वय र सञ्चारको निरन्तरता आवश्यक रहेको र यसका लागि आवश्यक भूमिका निर्वाह गर्न नेपाल राष्ट्र बैंक तत्पर रहेको विचार व्यक्त गरे ।
भेटका अवसरमा पिपुल्स बैंक अफ चाइना (पीबीओसी) का अन्तर्राष्ट्रिय विभागकी महानिर्देशक चउ यु तथा राष्ट्र बैंकका तर्फबाट बैंक सुपरिवेक्षण विभागका कार्यकारी निर्देशक दीर्घबहादुर रावल र गभर्नरको कार्यालयका सहायक निर्देशक रोशन न्यौपानेको समेत सहभागिता थियो ।
ट्रेन्डिङ
सम्बन्धित
