जाँचबुझ आयोगको प्रगति विवरण सदनमा सार्वजनिक गर्न माग

काठमाडौँ । राष्ट्रिय सभाको मंगलबारको बैठकमा सांसदहरूले मुलुकका विभिन्न समसामयिक समस्याहरूका बारेमा सरकारको ध्यानाकर्षण गराएका छन्। बैठकको विशेष समयमा बोल्दै सांसद सुमित्रा बिसीले गत भदौ २३ र २४ गते भएको ‘जेनजी’ प्रदर्शनका क्रममा मानवीय तथा भौतिक क्षति भएको उल्लेख गर्दै सो घटनाको छानबिन गर्न गठित जाँचबुझ आयोगको प्रगति विवरण सदनमा सार्वजनिक गर्न माग गरेकी छन्।

सांसद गङ्गाकुमारी वेल्वासेले राष्ट्रिय निकुञ्ज तथा मध्यवर्ती क्षेत्रहरूमा वन्यजन्तुको आक्रमणबाट बर्सेनि नागरिकले ज्यान गुमाउनुपरेको भन्दै मानव–वन्यजन्तु द्वन्द्व न्यूनीकरणमा सरकार गम्भीर हुनुपर्ने बताएकी छन्। त्यसैगरी, सांसद गोपीबहादुर सार्की आछामीले झापा, मोरङ, सुनसरी र उदयपुर लगायतका जिल्लाहरूमा हात्तीको आतङ्कले जनजीवन कष्टकर बनेको तर्फ सदनको ध्यान खिचेका छन्।

स्वास्थ्य र राहतका विषयमा बोल्दै सांसद तुलसाकुमारी दाहालले सर्लाही जिल्लामा दादुरा र रुबेला जस्ता सरुवा रोगको प्रकोप बढिरहेकाले तत्काल नियन्त्रणका उपाय र स्वास्थ्य सेवा पुर्‍याउन माग गरेकी छन्। सांसद मायाप्रसाद शर्माले जाजरकोट भूकम्प गएको लामो समय बितिसक्दा पनि पीडितहरूले अझै पर्याप्त राहत र पुनर्निर्माणको सुविधा नपाएको गुनासो गर्दै उनीहरूको कष्टकर जीवनप्रति सरकारको ध्यानाकर्षण गराएका छन्। यस्तै, सांसद शारदादेवी भट्टले सडक दुर्घटना न्यूनीकरणका लागि मदिरा सेवन गरी सवारी चलाउने र ट्राफिक नियम उल्लङ्घन गर्नेहरूलाई थप कठोर कानुनी सजायको व्यवस्था गर्नुपर्नेमा जोड दिएकी छन्।