राष्ट्रियसभा चुनावमा ९५.६८ प्रतिशत मत खस्यो

काठमाण्डाै – आज भएको राष्ट्रियसभा सदस्य चुनावमा ९५ दशमलव ६८ प्रतिशत मत खसेको छ । सातै प्रदेशमा गरि ९५ दशमलव ६८ प्रतिशत मत खसेको आयोगका प्रवक्ता नारायणप्रसाद भट्टराईले जानकारी दिए ।

उहाँका अनुसार कोशीमा ३ सय ४५ जना, मधेशमा ३ सय ४१ जना, बाग्मतीमा ३ सय १८ जना, गण्डकीमा २ सय २३ जना, लुम्बिनीमा २ सय ८६ जना, कर्णालीमा १ सय १९ जना र सुदूरपश्चिममा २ सय २० जनाले मतदान गरेका हुन् ।

राष्ट्रियसभा चुनावमा प्रदेशसभा सदस्य, पालिकाका प्रमुख/उपप्रमुख, अध्यक्ष/उपाध्यक्ष मतदाता रहने व्यवस्था छ । आज विशेषगरी राष्ट्रिय प्रजातन्त्र पार्टी (राप्रपा) बाट निर्वाचित जनप्रतिनिधिहरू मतदानमा सहभागी भएनन् ।

सबै प्रदेशमा आजै मतगणना हुने आयोगले जनाएको छ ।