सरकारी विज्ञापन कारोबारसम्बन्धी समाचारप्रति नेपाल विज्ञापन संघको गम्भीर ध्यानाकर्षण

काठमाडौं। सरकारी विज्ञापन कारोबारका विषयमा सञ्चार माध्यमहरूमा प्रकाशित समाचार र विज्ञप्तिप्रति नेपाल विज्ञापन संघ (आन) ले गम्भीर ध्यानाकर्षण भएको जनाएको छ।

संघले माघ ९ गते जारी गरेको विज्ञप्तिमा कान्तिपुर दैनिक मा प्रकाशित “सरकारी विज्ञापनमा ३ अर्ब गायब” शीर्षकको समाचार र सोही विषयलाई लिएर नेपाल रिपब्लिक मिडिया लिमिटेडबाट जारी विज्ञप्तिले आम जनमानस र सरोकारवाला निकायहरूमा अनावश्यक भ्रम सिर्जना गरेको उल्लेख गरिएको छ।

एउटा जिम्मेवार व्यावसायिक संस्थाको हैसियतले विज्ञापन बजारको पारदर्शिता र मर्यादासँग जोडिएका यस्ता समाचारले समग्र विज्ञापन क्षेत्रको छविमा नकारात्मक असर पारेको संघको ठहर छ।

विज्ञप्तिमा सञ्चार माध्यममा उल्लेख गरिएको “तीन अर्ब गायब” भन्ने विषयको कुनै ठोस तथ्याङ्क र कानुनी आधार नरहेको दाबी गरिएको छ। सार्वजनिक खरिद प्रक्रियामार्फत हुने सरकारी विज्ञापनको वितरण र भुक्तानी प्रक्रियालाई नै गलत ढंगले व्याख्या गर्दा समग्र विज्ञापन जगतको छविमा आँच पुगेको संघको भनाइ छ।

संघले सञ्चार गृहहरू आफैंमा विज्ञापन बजारका अभिन्न हिस्सा भएको उल्लेख गर्दै राज्यको चौथो अंगका रूपमा सञ्चार माध्यमले तथ्यका आधारमा गलत कार्य उजागर गर्नु महत्त्वपूर्ण दायित्व भए पनि, पुष्टि नभएका विषयमा अर्को सञ्चार गृह वा विज्ञापन एजेन्सीलाई लक्षित गरी भ्रम फैलाउनु व्यावसायिक मर्यादा र पत्रकारिताको मूल्यमान्यताविपरीत हुने स्पष्ट पारेको छ।

यस्ता भ्रामक समाचारले विज्ञापन चक्रमा संलग्न विज्ञापनदाता, एजेन्सी र सञ्चार माध्यमबीचको विश्वासको वातावरण कमजोर बनाउनुका साथै विज्ञापन पेशा–व्यवसाय नै धराशायी हुने जोखिम बढाएको संघको बुझाइ छ।

विज्ञापन बजारलाई व्यवस्थित, पारदर्शी र मर्यादित बनाउन नेपाल विज्ञापन संघ सधैं प्रतिबद्ध रहेको उल्लेख गर्दै विज्ञप्तिमा विज्ञापन कारोबार गर्दा एजेन्सीको रूपमा दर्ता मात्र नभई संगठनात्मक आबद्धता र मान्यता प्राप्त फर्म वा कम्पनीहरूसँग मात्र काम गर्न संघले पहिलेदेखि नै सञ्चार गृहहरूलाई आग्रह गर्दै आएको जनाइएको छ। अपुष्ट समाचारका कारण २५ अर्ब रुपैयाँभन्दा बढीको समग्र विज्ञापन पेशा–व्यवसायलाई अनावश्यक दोषारोपण गरिएको संघको भनाइ छ।

कुनै पनि निकायमा अनियमितता भएको खण्डमा त्यसको छानबिन गर्न संवैधानिक र कानुनी बाटो हुँदाहुँदै सञ्चार माध्यममार्फत एकपक्षीय र भ्रामक सूचना सम्प्रेषण हुनु खेदजनक भएको संघले उल्लेख गरेको छ।

संघले भ्रामक समाचारहरूको पछि नलाग्न र सत्य–तथ्य बुझेर मात्र सूचना तथा समाचार सम्प्रेषण गरी व्यावसायिक धर्म निर्वाह गर्न  विज्ञापनदाता, एजेन्सी सञ्चालक तथा सम्बन्धित सरोकारवालाहरूलाई अनुरोध समेत गरेको छ।