महावीर पुनलाई साना दल र उम्मेदवारको सहयोग

बेनी । म्याग्दीको प्रतिनिधिसभा निर्वाचनमा स्वतन्त्र उम्मेदवार महावीर पुन केन्द्रमा देखिन थालेका छन्। विभिन्न स्वतन्त्र र साना दलका उम्मेदवारले समर्थन जनाएपछि म्याग्दीमा चुनावी समीकरण नयाँ दिशातर्फ मोडिएको छ ।

राष्ट्रिय स्वतन्त्र पार्टीका उम्मेदवार युवराज रोकाले पार्टी निर्देशन र शुभेच्छुकको सुझावअनुसार उम्मेदवारी निष्क्रिय पार्दै महावीर पुनलाई सघाउने घोषणा गरेपछि चुनावी माहोल थप रोचक बनेको छ । पत्रकार सम्मेलनमा रोकासँगको संवादका क्रममा महावीरले गरेको “बल्ल बुद्धि आएछ” भन्ने टिप्पणीले माहोल हल्का भए पनि त्यसले उनी चुनावलाई कति सहज र आत्मविश्वासका साथ लिइरहेका छन् भन्ने सजिलै बुझ्न सकिन्छ ।

महावीर पुन भने औपचारिक मञ्चभन्दा चौतारी, सार्वजनिक स्थल र खुला संवादलाई प्राथमिकता दिइरहेका छन्। पिपलको रुखमुनी बसेर पत्रकार र सर्वसाधारणसँग आफ्ना अनुभव, असफलता र योजनाबारे खुलेर कुरा गर्ने शैलीले उनी अन्य दलिय राजनीतिभन्दा फरक देखिएका छन्।

मन्त्री पद छाड्नुको कारण स्पष्ट पार्दै पुनले आफू ‘धोकेबाज’ वा ‘भगौडा’ नभई काम गर्न नसक्ने ठाउँमा बस्न नचाहने व्यक्ति भएको जिकिर गरेका छन्। शिक्षा क्षेत्रमा सुधार, विश्वविद्यालयको नेतृत्व प्रणाली, प्राविधिक शिक्षाको बेथिति र विदेशमा रहेका नेपालीको मतदान अधिकार उनका मुख्य राजनीतिक मुद्दा बनेका छन्।

चुनावी अभियानकै क्रममा आत्मकथा पुस्तक बिक्री गर्दा आचारसंहिताको स्पष्टीकरण सोधिएपछि उनले असन्तोष व्यक्त गरे पनि त्यसलाई चुनावी मुद्दा नबनाएर वैकल्पिक उपायका लागि चुनावमा होमिएको बताएका छन् ।

म्याग्दीको विकास इतिहाससँग गहिरो सम्बन्ध रहेको भूगोलबाट पुन पुनः चुनावी मैदानमा फर्किएका छन्। जापानी समाजशास्त्री जिरो कावाकिताको ‘केजे मेथोड’ बाट प्रभावित विकास मोडेललाई व्यवहारमा उतारेका पुन आफूलाई नेता भन्दा पनि प्रयोगकर्ता र अभियन्ताका रूपमा प्रस्तुत गर्न चाहन्छन्।

१३ जनाको उम्मेदवारी रहेको म्याग्दीमा स्वतन्त्र उम्मेदवारको वरिपरि समर्थन थपिँदै जानु, चौतारीबाटै राजनीति हुनु र खुला संवादको अभ्यासले अन्य दलहरुको तुलनामा पुनको प्रचारप्रसार फरक देखिएको छ ।