टिओबीको टिसर्ट लगाउने तेन्जेनको पेस्तोल नक्कली, भिडियो पूरानो

काठमाडाैं । ‘टिओबी’को टिसर्ट लगाएर पेस्तोल बोकेकाे भिडियाेपछि विवादमा तानिएका तेन्जिङ दावाको घरबाट नक्कली पेस्तोल बरामद भएकाे छ । काठमाडौंको बौद्ध स्थित दावाको घरबाट उक्त पेस्तोल बरामद गरिएको काठमाडौं प्रहरी प्रमुख एसएसपी रमेश थापाले जानकारी दिए ।

नक्कली पेस्ताेलसहित भेटिएका दाबालाई अभद्र व्यवहार सम्बन्धी आरोपमा पक्राउ गरी अनुसन्धान अघि बढाइएको प्रहरीले जनाएकाे छ ।

साथै, उनलाई टिओबी नामक संगठनसँगको सम्बन्धबारे पनि अनुसन्धान थालिएकाे प्रहरीकाे भनाइ छ । उनको ज्याकेटमा लेखिएको ‘टिओबी’ को अर्थ ‘तिब्बतीयन ओरिजनल ब्लड’ रहेको कुरा अधिकारीहरूले बताएका छन्।

सँगै, पेस्ताेलसहित बनाइएकाे उनकाे भिडियाे पुरानाे भएकाे पुष्टि प्रहरीले गरेकाे छ । भिडियोमा तेन्जिङ दावालाई बिजुली बजार पुल मा कालो ड्रेस र टीओबी टिसर्ट लगाएर पेस्तोल कम्मरमा भरेर बाइक चलाउँदा देखिन्छ। प्रहरी अधिकारीहरूले भनेका छन् कि भिडियोको वास्तविकता र सम्बन्धित युवकको पृष्ठभूमिबारे थप अनुसन्धान जारी छ।

तेन्जिङ दावा एक ट्याटु आर्टिस्ट हुन्, जसले केही समय अघि बौद्ध क्षेत्रमा ट्याटु पसल खोलेका थिए। बताइएअनुसार हालका दिनमा भने उनकाे पसल बन्द छ ।