जेनजी नेपालको अपिल- हाम्रो विद्रोहले दल अश्वीकार गरेको होइन, चुनावको विकल्प छैन

काठमाडौं । जेनजी प्रतिनिधि रक्षा बमले राजनीतिक दललाई निर्वाचनमा सहभागी हुन अपिल गरेकी छन्। इतिहासले अहिलेका राजनीतिक दलहरूलाई एउटा गम्भीर मोडमा उभ्याएको भन्दै समस्याको समाधान निर्वाचनकाे विकल्प नभएको उनको भनाइ छ।

अपिलमा भनिएको छ, ‘अब आवश्यक कुरा विद्रोहको आवेग होइन । न त विद्रोहलाई गिज्याउने शैली नै हो । आजको आवश्यकता यस विद्रोहको सत्यलाई संस्थागत रूप दिने विवेकको हो । इतिहासले अहिलेका राजनीतिक दलहरूलाई एउटा गम्भीर मोडमा उभ्याएको छ । या त जनताको विश्वास पुनःआर्जन गर्ने साहस देखाउनुहोस् । या फेरि इतिहासको परित्यक्त पानामा हराउन तयार रहनुहोस् ।’

नेपाल नयाँ युगको प्रवेशद्वारमा उभिएको उनको भनाइ छ। उनले भनेकी छन्, ‘अब पाखा पल्टिने होइन, मार्ग तय गर्ने समय आएको छ । यही प्रक्रिया हाम्रो लोकतान्त्रिक निरन्तरताको आधार हो। यही बाटो विद्रोहको औचित्यलाई संस्थागत बनाउने माध्यम हो । अव चुनावमा जानु राष्ट्रको साझा राजनीतिक जिम्मेवारी हो । इतिहाससँगको हाम्रो प्रतिवद्धताको निर्णायक परीक्षा हो ।’

परिवर्तनको म्यान्डेट जनताको हातमा सुम्पिने ऐतिहासिक घडीमा सम्पूर्ण राजनीतिक दल, राजनीतिक शक्ति, नागरिक समाज, जेन-जी साथीहरू, युवा पुस्ता एवम् सम्पूर्ण नेपाली नागरिकहरूमा निर्वाचनमा लाग्न अपिल गरेको छ।

यो समूहमा प्रदिप ज्ञवाली,युजन राजभण्डारी,मनिष खनाललगायतका जेनजी अभियन्ता रहेका छन्,जो पहिलो दिनको आन्दोलन आह्वानकर्ता थिए । उनीहरु आज शीतल निवासमा पनि छलफलका लागि गएका थिए ।