राष्ट्र बैंकले बढायो सुन आयातकाे कोटा, अब दैनिक २५ किलोसम्म सुन ल्याउन पाउने

काठमाडौँ, २४ असोजः  नेपाल राष्ट्र बैंकले दैनिक सुन आयातको कोटा २० किलोबाट २५ किलो पुर्‍याएको छ ।

अब वाणिज्य बैंकहरूले दैनिक २५ किलोसम्म सुन आयात गर्न पाउने छन् । आयात गरिएको सुन व्यवसायीहरूले खरिद गरेर सर्वसाधारणलाई गहनाको रूपमा बिक्री गर्नेछन् ।

केन्द्रीय बैंकले बजारमा सुनको बढ्दो माग र मूल्य वृद्धिलाई ध्यानमा राखेर कोटा बढाएको हो । दीपावली नजिकिँदै गर्दा सुनको माग अझ बढ्ने अपेक्षा गरिएको छ । शुक्रबार प्रतितोला सुनको मूल्य २ लाख ३५ हजार रुपैयाँमा कायम भएको छ ।

यसैगरी, नेपाल राष्ट्र बैंकले विदेशबाट ल्याउन सकिने रेमिट्यान्सको सीमा पनि २० लाख रुपैयाँबाट २५ लाख रुपैयाँ पुर्‍याएको छ । अब नेपाली नागरिक वा नेपालमा दर्ता भएका फर्मरकम्पनीहरूले विदेशबाट पठाइएको रकम दैनिक २५ लाख रुपैयाँसम्म खातामा जम्मा गर्न सक्नेछन् ।

विप्रेषण कम्पनीहरूले रकम संकलन र भुक्तानी गर्दा ग्राहकको पहिचान कागजात लिनुपर्नेछ र हरेक महिना आएको रेमिट्यान्सको विवरण सम्बन्धित विभागमा सात दिनभित्र बुझाउनुपर्ने व्यवस्था गरिएको छ ।