लगानीकर्तालाई सुदूरपश्चिममा स्वागत गर्न आँतुर छौँ : मुख्यमन्त्री शाह

धनगढीः सुदूरपश्चिम प्रदेशका मुख्यमन्त्री कमलबहादुर शाहले सुदूरपश्चिम सरकार सुदूरपश्चिममा निजी क्षेत्रलाई लगानीका लागि स्वागत गर्न आँतुर रहेको बताएका छन्।

सुदूरपश्चिम लगानी तथा विकास सम्मेलनको पूर्वसन्ध्यामा संस्कृति, पर्यटन तथा नागरिक उड्डयन मन्त्रालय र सुदूरपश्चिम सरकारको आयोजना र नेपाल पर्यटन बोर्डको सहकार्यमा काठमाडौँमा भएको पर्यटन क्षेत्रसम्बन्धी छलफल कार्यक्रममा उनले सुदूरपश्चिमका सम्भावनाहरुलाई लगानी सम्मेलनमार्फत राष्ट्रिय–अन्तर्राष्ट्रियस्तरमा चिनाउन चाहेको बताए।

स्वदेशका निजी क्षेत्रलाई सुदूरपश्चिममा लगानीका लागि आवश्यक कानुनी तथा लगानी सुरक्षाको ग्यारेन्टी लिन प्रदेश सरकार तयार रहेको उनले बताए। मुख्यमन्त्री शाहले लगानी सम्मेलनमा सहभागी हुन र त्यहाँका सम्भावनाको अध्ययन गर्दै लगानी गर्न आह्वान गरे। सुदूरपश्चिम पर्यटकीय दृष्टिकोणले ‘भर्जिन ल्याण्ड’ भएको उल्लेख गर्दै लगानी गर्न मुख्यमन्त्री शाहले आह्वान  गरे।

कार्यक्रममा संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले सुदूरपश्चिमको पर्यटकीय पूर्वाधारमा लगानीका लागि आह्वान गरे।मन्त्री पाण्डेले भने, “सुदूरपश्चिम पर्यटक आकर्षणका मुख्य आधार नेचर, कल्चर र एड्भेन्चरको समिश्रण भएको प्रदेश हो।सुदूरपश्चिका थुप्रै पर्यटकीय सम्भावनाहरु उजागर भइरहेका छन्।यस लगानी सम्मेलनमार्फत् सुदूरपश्चिमका पर्यटकीय पूर्वाधारमा लगानी गर्न लगानीकर्ताहरुलाई आह्वान पनि गर्दछु।”