विश्वकै सबैभन्दा अग्लो पुलमा ९६ ट्रक राखेर भारवहन परीक्षण

काठमाडौं- चीनको बिपान नदीमाथि बनेको विश्वको सबैभन्दा अग्लो पुलको भारवहन परीक्षण गरिएको छ । चीनको गुइझोउ प्रान्तमा बनाइएको हुआजियाङ ग्रान्ड क्यान्यन पुलको उद्घाटन अघि अन्तिम स्ट्रेस परीक्षण गरिएको हो ।

चाइना डेलीका अनुसार पुलमा ५ दिन (अगस्ट २१–२५) सम्म कडा स्थिर लोड परीक्षण गरिएको थियो । परीक्षणका क्रममा कुल ३ हजार ३६० मेट्रिकटन तौल भएका ९६ वटा भारी ट्रकहरू पुलमा राखिएको थियो ।

४०० भन्दा बढी सेन्सरहरूले पुलको मुख्य फैलावट टावर, केबल र सस्पेन्डरहरूमा हुने सानोभन्दा सानो हलचलको पनि निगरानी गरेका थिए ।

बिपान नदीमाथि ६२५ मिटर उचाइमा निर्माण गरिएको यो पुल विश्वको सबैभन्दा अग्लो र पहाडी क्षेत्रमा सबैभन्दा लामो दुरीमा फैलिएको यो पुलको कुल लम्बाइ २ हजार ९०० मिटर छ ।

यो पुल आगामी सेप्टेम्बरदेखि सञ्चालनमा आउनेछ । यस पुलले लिउझी र अनलोङ बीचको यात्रा समयलाई २ घण्टाबाट घटाएर २ मिनेटमा झार्नेछ ।