इरानमा फसेका नेपालीलाई भारतले उद्दारमा मद्दत गर्ने

काठ्माण्डौँ – इजरायल र इरानबीच जारी युद्धका कारण इरानमा फसेका नेपाली नागरिकलाई भारत सरकारले उद्दारमा मद्दत गर्ने भएको छ ।
भारतले इरानमा फसेका नेपाल नागरिकसँगै श्रीलंकालीलाई पनि उद्दारमा मद्दत गर्नेछ ।

इरानको राजधानी तेहरानस्थित भारतीय दूतावासका अनुसार भारतले आफ्ना छिमेकी मुलुकहरू नेपाल र श्रीलङ्काका नागरिकहरूलाई इरानबाट उद्दार गर्न सहयोग गर्नेछ ।

दूतावासले एक्समा पोस्टमार्फत यो जानकारी दिएको हो । इरानस्थित भारतीय दूतावासले भनेको छ, ‘नेपाल र श्रीलङ्काको सरकारको अनुरोधमा दूतावासले इरानमा फसेका नेपाल र श्रीलङ्काका नागरिकहरूको उद्दारमा सहयोग गर्नेछ ।’ दूतावासले नेपाल र श्रीलङ्काका नागरिकहरूलाई आफूसँग सम्पर्क गर्न पनि अनुरोध गरेको छ ।

यसका साथै, भारतीय दूतावासले नेपाली र श्रीलङ्काली नागरिकहरूको सहायता गर्नका लागि टेलिग्राम च्यानल र आपतकालीन नम्बरहरू पनि सार्वजनिक गरेको छ ।

इरानमा रहेका नेपाली तथा श्रीलङ्काली नागरिकहरू सम्पर्क गर्नका लागि टेलिग्राम च्यानल वा आपत्कालीन नम्बरहरू प्रयोग गर्न सक्ने छ । यसका लागि दूतावासले +९८९०१०१४४५५७, +९८९१२८१०९११५ र +९८९१२८१०९१९ फोन नम्बर उपलब्ध गराएको छ ।