दक्षिणी गाजाको खान युनिसमा इजरायली आक्रमण, कम्तीमा ५१ प्यालेस्टिनीको मृत्यु

काठमाडौँ। इजरायली सेनाले मङ्गलबार बिहान दक्षिणी गाजा पट्टीको खान युनिसमा सहायताको पर्खाइमा रहेका कम्तीमा ५१ प्यालेस्टिनीको हत्या गरेको छ। यो आक्रमण खान युनिसको अल–ताहलिया राउन्डअबाउट नजिकै भएको थियो।
यस घटनामा २०० भन्दा बढी व्यक्ति घाइते भएका छन्, जसमध्ये २० जनाको अवस्था गम्भीर रहेको जनाइएको छ। घटनाको बारेमा इजरायली सेनाबाट तत्काल कुनै प्रतिक्रिया आएको छैन।

मार्च १८ मा इजरायलले एन्क्लेभमा आफ्नो सैन्य कारबाही पुनः सुरु गरेको थियो। इजरायलले आफ्नो हमलाहरू पुनः सुरु गरेदेखि कम्तीमा ५,१३९ प्यालेस्टिनीहरू मारिएका छन् भने १६,८८२ जना घाइते भएका छन्। गाजास्थित स्वास्थ्य अधिकारीहरूले दिएको जानकारीअनुसार, अक्टोबर २०२३ देखि अहिलेसम्म कुल मृत्यु हुनेको सङ्ख्या ५५,४३२ पुगेको छ र घाइतेहरूको सङ्ख्या १ लाख २८ हजार ९ सय २३ पुगेको छ।