अशोक भण्डारी र पूजा साउँद ‘सुदूरपश्चिम आइकन’

कैलाली। सातौँ ‘एसपीए सुदूरपश्चिम स्पोर्ट्स अवार्ड’ मा एथलेटिक्सकी पूजा साउँद र भारोत्तोलनका अशोक भण्डारीले ‘सुदूरपश्चिम आइकन’ को उपाधि हात पारेका छन्। नेपाल खेलकुद पत्रकार मञ्च कैलालीले आयोजना गरेको यस कार्यक्रममा उनीहरूलाई वर्षकै उत्कृष्ट खेलाडीका रूपमा सम्मानित गरिएको हो। महिला विधातर्फ एथलेटिक्सकी पूजा साउँदले कबड्डीकी दिपा देउवा र तेक्वान्दोकी दिपा जैसीलाई पछि पार्दै अवार्ड आफ्नो नाममा गराएकी हुन्। ट्रफी र नगद पुरस्कार बुझेपछि उनले यो सम्मानले आफ्नो खेल जीवनमा थप सफलता हासिल गर्न नयाँ ऊर्जा र प्रेरणा दिएको बताइन्।

त्यसैगरी, पुरुषतर्फको अवार्ड भारोत्तोलनका अशोक भण्डारीले जितेका छन्। राष्ट्रिय प्रतियोगिताहरूमा लगातार स्वर्ण पदक जित्दै नयाँ कीर्तिमान रच्न सफल भण्डारीले क्रिकेटका नारायण जोशी र सुटिङका सुनिल चन्दलाई प्रतिस्पर्धामा पछाडि छोडेका थिए। सम्मान ग्रहण गर्दै उनले यस्ता अवार्डले खेलाडीहरूमा खेलप्रतिको लगाव र जिम्मेवारी अझ बढाउने प्रतिक्रिया दिए।

विजेता दुवै खेलाडीलाई जनही २० हजार रुपैयाँ नगद र ट्रफी प्रदान गरिएको थियो। सुदूरपश्चिमको खेल क्षेत्रलाई थप चलायमान बनाउने उद्देश्यले  विभिन्न विधाका उत्कृष्ट खेलाडी सुदूरपश्चिम स्पोर्ट्स अवार्ड मार्फत सम्मानित हुँदै आएका छन् ।