१२ को नतिजाबारे शिक्षामन्त्री- प्रक्रिया मिचिएको छैन, ढिलासुस्ती मात्र हटाएका हौं

काठ्माण्डौ- शिक्षा तथा खेलकुदमन्त्री सस्मित पोखरेलले कक्षा १२ को नतिजा प्रकाशनमा कुनै पनि कानुनी वा प्राविधिक प्रक्रिया नमिचिएको बताएका छन्।

नतिजा असामान्य रूपमा छिटो सार्वजनिक गरिएको भन्दै विभिन्न क्षेत्रबाट प्रश्न उठ्न थालेपछि मन्त्री पोखरेलले शनिबार सामाजिक सञ्जालमार्फत स्पष्टीकरण दिएका हुन्।

मन्त्री पोखरेलले विगतमा अपनाइँदै आएका आवश्यक प्रक्रियाहरूलाई यथावत् राखेरै नतिजा छिटो ल्याउन सफल भएको दाबी गरे। उनका अनुसार नतिजा छिटो निकाल्नका लागि कुनै पनि विधिमा सम्झौता गरिएको छैन, बरु पुराना झन्झटिला प्रक्रियामा सुधार गरिएको छ।

‘नतिजा छिटो प्रकाशित गर्नका लागि विगतमा अपनाइँदै आएका कुनै पनि आवश्यक प्रक्रिया हटाइएको छैन,’ मन्त्री पोखरेलले भनेका छन्, ‘हामीले त केवल विगतको अनावश्यक ढिलासुस्तीलाई अन्त्य गरेर उचित समयमा नतिजा सार्वजनिक गरेका हौं।’

विशेष गरी उत्तरपुस्तिकाको क्रस-चेकिङको प्रक्रियामा ल्याइएको सुधारका कारण नतिजा चाँडो आएको उनको भनाइ छ।

विगतका वर्षहरूमा सबै उत्तरपुस्तिकाहरू परीक्षणपश्चात् समपरीक्षणका लागि अनिवार्य रूपमा काठमाडौं ल्याउनुपर्ने व्यवस्था थियो। यसपटक भने मन्त्रालयले उक्त व्यवस्थामा परिवर्तन गर्दै सम्बन्धित स्थानमै समपरीक्षण गर्न सकिने गरी विकेन्द्रित नीति अवलम्बन गरेको छ। यसले गर्दा उत्तरपुस्तिका ओसारपसारमा लाग्ने ठुलो समय बचत भएको मन्त्री पोखरेलले उल्लेख गरेका छन्।

नतिजा छिटो आउँदा परीक्षणको गुणस्तरमा प्रश्न उठाउनेहरूलाई जवाफ दिँदै मन्त्री पोखरेलले उत्तरपुस्तिका जाँचमा कुनै हतार नगरिएको स्पष्ट पारे। उनका अनुसार यसपटक परीक्षण कार्यलाई प्रभावकारी बनाउन विगतको तुलनामा उल्लेख्य संख्यामा जनशक्ति परिचालन गरिएको थियो।

‘उत्तरपुस्तिका अनावश्यक रूपमा लामो समयसम्म रोकिराख्ने प्रवृत्तिलाई हामीले नियन्त्रण गरेका हौं,’ उनले लेखेका छन्, ‘परीक्षण प्रक्रिया समयमै सुरु गरिएको हो, तर कसैलाई हतारहतार परीक्षण गर्न लगाइएको छैन। प्रशासनिक र प्रक्रियागत ढिलासुस्ती हटाउनुलाई हतारको रूपमा बुझ्नु गलत हुनेछ।’

यसैगरी, पुनर्योग शुल्क वृद्धिका सम्बन्धमा समेत मन्त्री पोखरेलले सरकारको बचाउ गरे। उक्त शुल्क वृद्धि वर्तमान सरकारको निर्णय नभई गत वर्षकै पूरक परीक्षादेखि नै लागू भइसकेको उनले जानकारी दिए।

यस सम्बन्धमा वर्तमान सरकारले कुनै नयाँ निर्णय नगरेको भन्दै उनले भ्रममा नपर्न आग्रह गरेका छन्।

मन्त्री पोखरेलले यस वर्षको नतिजा उत्साहजनक रहेको तथ्य पनि स्मरण गराए। विगतका वर्षहरूको तुलनामा यस वर्ष उत्तीर्ण प्रतिशतमा उल्लेख्य सुधार आएको छ। ‘गत वर्षको तुलनामा यस वर्ष उत्तीर्ण प्रतिशत करिब ८ प्रतिशतले वृद्धि भएको छ,’ मन्त्री पोखरेलले भने।

मन्त्री पोखरेलले नतिजा प्रकाशनको यो गतिलाई आगामी वर्षहरूमा पनि निरन्तरता दिइने प्रतिबद्धता व्यक्त गरे।