बाजुराको अर्ग्यानिक स्याउ बजारमा आउँदै, बगैँचामा पर्यटक र ग्राहकको चहलपहल बढ्यो

बाजुरा: बाजुरामा उत्पादन हुने अर्ग्यानिक स्याउ बजारमा आउन तयार भएसँगै किसानका स्याउ बगैँचामा चहलपहल बढ्न थालेको छ। केही जातका स्याउ पाकिसकेका छन् भने अधिकांश जात पाक्ने क्रममा रहेकाले स्थानीय उपभोक्ता र आन्तरिक पर्यटकहरू बगैँचामै पुगेर ताजा स्याउको स्वाद लिन, खरिद गर्न तथा फोटो–भिडियो खिच्न व्यस्त देखिएका छन्।

बुढिनन्दा नगरपालिका–९ पाण्डुसैनस्थित सहारा स्याउ गार्डेनका सञ्चालक पुरबहादुर रावतका अनुसार पछिल्ला दिनमा ग्राहकहरू बगैँचामै पुगेर स्याउ खरिद गर्ने र ताजा स्याउको स्वाद लिन आउने क्रम उल्लेखनीय रूपमा बढेको छ। सामाजिक सञ्जालका लागि फोटो तथा भिडियो खिच्न आउने आन्तरिक पर्यटकको संख्या पनि बढ्दै गएको उनले बताए।

कृषि ज्ञान केन्द्रका अनुसार बाजुरामा करिब १७० हेक्टर क्षेत्रफलमा स्याउ खेती हुँदै आएको छ। जिल्लाबाट वार्षिक करिब १,०२० मेट्रिकटन स्याउ उत्पादन हुने गरेको छ। उत्पादन वृद्धि भएसँगै स्याउ खेती किसानको आम्दानीको महत्वपूर्ण स्रोतका रूपमा स्थापित हुँदै गएको छ।