शुक्लाफाँटा नगरपालिकामा अनुमतिबिना घुम्ती व्यापार गर्न नपाइने

कञ्चनपुर । कञ्चनपुरको शुक्लाफाँटा नगरपालिकामा अनुमतिबिना अनधिकृत रूपमा घुम्ती व्यापार, व्यवसाय सञ्चालन गर्न नपाइने भएको छ ।

नगरपालिकाको क्षेत्राधिकारभित्र पूर्वस्वीकृति नलिई ढुवानी तथा सवारीसाधनको प्रयोग गरी व्यवसाय गरेको पाइएमा प्रचलित कानुनबमोजिम कडा कारबाही गरिने भएको छ । नगरपालिकाका प्रमुख प्रशासकीय अधिकृत खेमराज बिष्टका अनुसार, पालिकाको क्षेत्राधिकारभित्र अनधिकृत रूपमा मोटरसाइकल, टाँगा, रिक्सा, मिनि ट्रकलगायत सवारीसाधनमार्फत पूर्वस्वीकृतिबिना व्यापार, व्यवसाय गरिरहेको गुनासो आएपछि कडाइ गरिएको हो ।

हाल नगरपालिकाको पूर्वस्वीकृति नलिई बजार तथा ग्रामीण क्षेत्रमा पुगेर घुम्ती व्यापार गर्नेमा अधिकांश भारतीय नागरिक रहेका पाइएको छ । पूर्वस्वीकृतिबिना व्यापार गरेको पाइएमा प्रचलित कानुनबमोजिम कारबाही प्रक्रिया अगाडि बढाइने अधिकृत बिष्टले स्पष्ट पारे ।

यस्तै, नगरपालिकाले सडक क्षेत्रलाई सुरक्षित र जोखिममुक्त बनाउन विशेष कार्य अगाडि बढाएको छ । स्थानीय सडक, सडक किनारा र अरू सार्वजनिक स्थानमा पशुचौपाया बाँध्ने एवं बालुवा, गिट्टी, ढुंगा, काठ, इँटा, माटोलगायत निर्माण सामग्री थुपार्ने कार्यलाई निरुत्साहन गर्न लागिएको छ ।

नगरपालिकाको पूर्वस्वीकृतिबिना सडकमा निर्माण सामग्री थुपार्ने र बाटो खनेर क्षति पुर्‍याउने कार्यले सर्वसाधारण तथा सवारीसाधनको आवतजावतमा बाधा पुग्नुका साथै दुर्घटनाको जोखिम बढेकाले यस्ता कार्य नगर्न आग्रह गरिएको छ । “सडक क्षेत्रमा अवरोध पुर्‍याउने वा क्षति गर्ने कार्य गरिएको पाइएमा नगरपालिकाको सडक मापदण्ड कार्यविधि, २०७६ बमोजिम कारबाही गरिनेछ,” प्रमुख प्रशासकीय अधिकृत बिष्टले भने ।

नगरपालिकाले सडक अतिक्रमण हटाउन, अनधिकृत व्यापार रोक्न र सर्वसाधारणलाई सचेत पार्नका निम्ति नगर प्रहरी समेत परिचालन गरी निरन्तर रूपमा अनुगमन तथा सचेतीकरण कार्य गरिरहेको जनाएको छ । रासस