बालबालिकालाई पार्टी सदस्यता दिएको विषयमा रास्वपासँग मानव अधिकार आयोगको पत्र

काठमाण्डौ । राष्ट्रिय मानव अधिकार आयोगले १८ वर्षभन्दा कम उमेरका बालबालिकालाई पार्टी सदस्यता वितरण गरिएको विषयमा राष्ट्रिय स्वतन्त्र पार्टी (रास्वपा) लाई पत्रचार गरेको छ।

रास्वपाले बालबालिकालाई दलको सदस्यता दिएको  भन्दै   समाचार सार्वजनिक भएपछि आयोगले बुधबार पत्राचार गरेको हो। आयोगका सहायक प्रवक्ता श्यामबाबु काफ्लेले जारी गरेको प्रेस विज्ञप्तिअनुसार रास्वपाको महाधिवेशनमा १८ वर्षमुनिका बालबालिकालाई पार्टी सदस्यता वितरण गरिएको उल्लेख भएको र त्यस्तो कार्य प्रचलित नेपाली कानुन तथा नेपालले गरेका अन्तर्राष्ट्रिय प्रतिबद्धताविपरीत हुने आयोगको ठहर गरेको छ।

विज्ञप्तिमा राष्ट्रिय मानव अधिकार आयोग ऐन, २०६८ को दफा २१९१० अनुसार उक्त विषयमा यथाशीघ्र विस्तृत जानकारी उपलब्ध गराउन रास्वपालाई अनुरोध गरिएको  छ।

रास्वपाको पहिलो राष्ट्रिय महाधिवेशनका क्रममा सार्वजनिक भएको प्रतिवेदनमा पार्टीले ३५ हजारभन्दा बढी बालबालिकालाई सदस्यता वितरण गरेको विवरण बाहिर आएपछि उक्त विषय विवादमा परेको हो।