विष्णुप्रसाद पौडेललाई थुनामुक्त गर्न सर्वोच्चको अस्वीकार

काठमाडौं । नेकपा (एमाले)का उपाध्यक्ष एवं पूर्वअर्थमन्त्री विष्णुप्रसाद पौडेललाई थुनामुक्त गर्न सर्वोच्च अदालतले अस्वीकार गरेको छ ।

पौडेलकी पत्नीले दायर गरेको बन्दीप्रत्यक्षीकरणको रिटमा सुनुवाइ गर्दै मंगलबार सर्वोच्चका न्यायाधीशद्वय टेकप्रसाद ढुङ्गाना र मेघराज पोखरेलको संयुक्त इजलासले सम्पत्ति शुद्धीकरण मुद्दाको सक्कल मिसिल झिकाउन आदेश दिएको हो।

असार ८ गते सुर्खेतबाट पक्राउ परेका उनीमाथि पहिलोपटक ७ दिन र दोस्रोपटक ३ दिन म्याद थपेर अनुसन्धान भइरहेको छ । यसअघि असार ११ गतेको सुनुवाइमा न्यायाधीश श्रीकान्त पौडेलको इजलासले कारण देखाउ आदेश दिएको थियो। रिट निवेदकको माग बमोजिम किन आदेश दिनु नपर्ने हो, त्यसको कारण पेश गर्न भनेको थियो।