लिट्मसलाई भारतीय प्रसारण निकायबाट कन्डक्टर आपूर्तिको अनुमति
काठमाडौं- नेपालको तार, केबल तथा कन्डक्टर उत्पादन गर्ने उद्योग लिट्मस इन्डस्ट्रिज लिमिटेडले भारतको केन्द्रीय विद्युत् प्रसारण निकाय ‘पावर ग्रिड कर्पोरेसन अफ इन्डिया (PGCIL)’ बाट सीमा–पार विद्युत् प्रसारण लाइन परियोजनामा कन्डक्टर आपूर्तिका लागि स्वीकृति प्राप्त गरेको छ।
यो स्वीकृतिसँगै लिट्मस इन्डस्ट्रिज सीमा–पार विद्युत् प्रसारण परियोजनाका लागि कन्डक्टर आपूर्ति गर्ने एकमात्र नेपाली उत्पादक बनेको कम्पनीले जनाएको छ। पावर ग्रिड कर्पोरेसन अफ इन्डिया भारतको अन्तरराज्य तथा अन्तरदेशीय विद्युत् प्रसारण सञ्जाल सञ्चालन गर्ने केन्द्रीय निकाय हो।
सम्झौताअनुसार लिट्मसले ४०० केभी एसीएसआर मूस (ACSR Moose) कन्डक्टर २,७०० किलोमिटर उत्पादन तथा आपूर्ति गर्नेछ। यी कन्डक्टर नेपाल–भारतबीच निर्माण भइरहेको ढल्केबर–बथनाहा सीमा–पार विद्युत् प्रसारण लाइनमा प्रयोग गरिनेछ । जुन ९०० मेगावाट क्षमताको अरुण–३ जलविद्युत् आयोजनासँग सम्बन्धित छ। नेपालमा पहिलो पटक ४०० केभी एसीएसआर मूस कन्डक्टर उत्पादन हुन लागेको हो।
परियोजनाको स्वीकृतिपूर्व पावर ग्रिड कर्पोरेसन अफ इन्डियाले लिट्मस इन्डस्ट्रिजको उत्पादन प्रक्रिया, क्षमता, गुणस्तर नियन्त्रण प्रणाली, परीक्षण मापदण्ड तथा समग्र कारखाना पूर्वाधारको विस्तृत मूल्यांकन गरेको थियो। उक्त मूल्यांकनपछि मात्र कम्पनीलाई कन्डक्टर आपूर्तिका लागि योग्य नेपाली उत्पादकका रूपमा स्वीकृति प्रदान गरिएको हो।
ढल्केबर–बथनाहा प्रसारण लाइन नेपालका महत्वपूर्ण ऊर्जा पूर्वाधारमध्ये एक हो, जसले नेपाल–भारतबीच विद्युत् व्यापार विस्तार गर्नुका साथै नेपालको ऊर्जा सुरक्षा सुदृढ बनाउन सहयोग गर्ने अपेक्षा गरिएको छ।
लिट्मस इन्डस्ट्रिजले यसअघि पनि नेपाल विद्युत् प्राधिकरण अन्तर्गत हेटौंडा–ढल्केबर–इनरुवा प्रसारण लाइन परियोजनाका लागि ४०० केभी एसीएसआर मूस कन्डक्टर ३,६०० किलोमिटर आपूर्ति गरिसकेको छ। कम्पनीको यो उपलब्धिले नेपाली उद्योगको अन्तर्राष्ट्रिय प्रतिस्पर्धात्मक क्षमता र विश्वसनीयता थप सुदृढ भएको संकेत गरेको छ।
यो स्वीकृतिलाई नेपाली औद्योगिक क्षेत्रका लागि महत्वपूर्ण उपलब्धिका रूपमा हेरिएको छ । यसले सीमा–पार ऊर्जा पूर्वाधार विकासमा नेपालको सहभागिता र औद्योगिक क्षमता अन्तर्राष्ट्रिय स्तरमा स्थापित गर्न थप मद्दत गर्ने विश्वास गरिएको छ।
लिट्मस नेपालमा तार, केबल तथा कन्डक्टर उत्पादन गर्ने अग्रणी उद्योग हो।
ट्रेन्डिङ
सम्बन्धित
