स्वास्थ्य बीमा नवीकरण नगरे चर्को शुल्क, सह–भुक्तानीमा भने आकर्षक छुट

काठमाडौँ । स्वास्थ्य बीमा बोर्डले समयमा स्वास्थ्य बीमा नवीकरण नगर्ने बिमित परिवारका लागि चर्को शुल्क लाग्ने जनाएको छ । बोर्डका जनस्वास्थ्य अधिकृत सूचना अधिकारी विकेश मल्लले एकपटकको अवसर दिँदै आगामी २०८२ असोज मसान्तसम्म नवीकरण गरेमा कुनै पनि थप शुल्क नलाग्ने बताए ।

उनले बोर्डले बिमित परिवारलाई निर्धारित समयभित्रै नवीकरण गरी स्वास्थ्य सेवामा लिन आग्रह गरे ।

सह–भुक्तानीमा चाहिँ आकर्षक छुट

सूचना अधिकारी बीमा कार्यक्रममा आबद्ध बीमितलाई भने सह–भुक्तानी (बीमा दाबी गर्दा ग्राहकले आफैंले पनि तिर्नुपर्ने रकम निश्चित अंश)मा आकर्षक छुट व्यवस्था गरिएको बताए । आबद्ध बीमितलाई सह–भुक्तानीमा ३० प्रतिशतसम्म सुविधा दिइएको मल्लले सुनाए । लामो समयसम्म नियमित नवीकरण गर्ने बीमितले ३० प्रतिशतसम्मको सह–भुक्तानी छुट प्राप्त गर्न सक्नेछन् ।  यस सुविधाले बीमितहरूलाई आर्थिक भार कम गर्न सहयोग पुग्ने उनको जिकिर छ ।

उनका अनुसार  तीन वर्षसम्म लगातार नियमित रुपमा बीमा नवीकरण गर्ने बीमितले प्रचलित कानून अनुसार गर्नु पर्ने सह–भुक्तानीमा १० प्रतिशत छुट प्राप्त गर्नेछन् ।

यस्तै चार वर्षदेखि सात वर्षसम्म नियमित रुपमा बीमा नवीकरण गर्ने बीमितका हकमा पनि सह–भुक्तानीमा २० प्रतिशत छुटको व्यवस्था गरिएको छ ।

यसैगरी  सात वर्षभन्दा बढी समयसम्म निरन्तर रुपमा बीमा नवीकरण गर्ने बीमितहरूलाई सबैभन्दा बढी,  सह–भुक्तानीमा ३० प्रतिशत छुट प्रदान गरिने छ ।