रास्वपाको महाधिवेशन आउनै लाग्दा ९ जिल्लामा भएन जिल्ला अधिवेशन

काठमाडौं। राष्ट्रिय स्वतन्त्र पार्टी (रास्वपा)ले देशभर संगठन विस्तार अभियानअन्तर्गत हालसम्म ६४ जिल्लामा जिल्ला अधिवेशन सम्पन्न भएको जनाएको छ। पार्टीका अनुसार ९ जिल्लामा भने जिल्ला अधिवेशन हुन बाँकी रहेको छ भने केही जिल्लामा सुरु भएको अधिवेशन प्रक्रिया स्थगित भएको छ।

रास्वपाका महामन्त्री कविन्द्र बुर्लाकोटीका अनुसार हालसम्म ४ हजार ३६३ वटा वडा, ६०९ वटा पालिका र ६४ वटा जिल्लामा अधिवेशन सम्पन्न भइसकेको छ।

पार्टीका अनुसार कर्णाली प्रदेशका डोल्पा र हुम्ला, लुम्बिनी प्रदेशको रुकुम पूर्व, गण्डकी प्रदेशका मनाङ र मुस्ताङ तथा मधेश प्रदेशका धनुषा, सप्तरी, बारा र सर्लाहीमा जिल्ला अधिवेशन हुन बाँकी छ।

यस्तै, सिन्धुपाल्चोक, सिराहा, महोत्तरी र रौतहटमा अधिवेशन प्रक्रिया सुरु भए पनि विभिन्न कारणले स्थगित भएको पार्टीले जनाएको छ।

रास्वपाका अनुसार कोशी, बागमती, गण्डकी र लुम्बिनी प्रदेशका प्रदेश अधिवेशन सम्पन्न भइसकेका छन्। मधेश प्रदेशको अधिवेशन स्थगित रहेको छ भने कर्णाली र सुदूरपश्चिम प्रदेशमा अधिवेशन प्रक्रिया जारी छ।

यसैबीच, पार्टीले आफ्नो ऐतिहासिक प्रथम राष्ट्रिय महाधिवेशन आगामी असार ७, ८ र ९ गते चितवनमा आयोजना गर्ने तयारीलाई तीव्र बनाएको जनाएको छ। महाधिवेशनका लागि संगठनात्मक तयारी, प्रतिनिधि व्यवस्थापन तथा अन्य आवश्यक कार्यहरू अन्तिम चरणमा पुगेको पार्टीको भनाइ छ।