परराष्ट्रमन्त्री खनाल र विदेशमन्त्री वाङबीच द्विपक्षीय वार्ता हुँदै

काठमाडौं : चीनको औपचारिक भ्रमणमा रहेका परराष्ट्रमन्त्री शिशिर खनाल र उनका चिनियाँ समकक्षी वाङ यीबीच आज भेटवार्ता हुँदैछ।
बेइजिङमा स्थानीय समयानुसार आज अपराह्न ५:४५ बजे हुने द्विपक्षीय प्रतिनिधिमण्डलबीच भेटवार्ता हुन लागेको हो।

चिनियाँ विदेशमन्त्री वाङ यीको निमन्त्रणामा भएको भ्रमणमा नेपाल–चीन सम्बन्ध सुदृढीकरण, आर्थिक कूटनीति विस्तार तथा लगानी प्रवर्द्धनका दृष्टिले महत्वपूर्ण  हुने मन्त्रालयले जनाएको छ ।

मन्त्रालयका अनुसार परराष्ट्रमन्त्री खनालले आजै चीनका उच्च अधिकारीहरूसँग पनि बेग्लाबेग्लै भेटवार्ता गर्ने तालिका छ । मन्त्री खनालले भ्रमणकै क्रममा आयोजना हुने लगानी सम्मेलनमा सहभागिता जनाउनेछन्। सम्मेलनमा चिनियाँ लगानीकर्ता तथा व्यवसायी समुदायलाई नेपालका ऊर्जा, पर्यटन, कृषि, सूचना प्रविधि, पूर्वाधार तथा उत्पादनमूलक क्षेत्रमा रहेका सम्भावना र अवसरबारे जानकारी गराउने कार्यक्रम छ।

परराष्ट्र अधिकारीहरूका अनुसार नेपालले विदेशी लगानी, प्रविधि हस्तान्तरण तथा रोजगारी सिर्जनामा जोड दिँदै चीनसँगको आर्थिक सहकार्यलाई अझ प्रभावकारी बनाउने लक्ष्य राखेको छ। यही उद्देश्यअनुसार मन्त्री खनालले विभिन्न व्यावसायिक तथा लगानीसम्बन्धी कार्यक्रममा सहभागी हुँदै चिनियाँ निजी क्षेत्रसँग प्रत्यक्ष संवाद गर्ने कार्यक्रम तय गरिएको हो।

मन्त्री खनाल भ्रमण सम्पन्न गरी असार ३ गते स्वदेश फर्किने कार्यक्रम छ ।

भ्रमणको पहिलो दिन नै बेइजिङस्थित नेपाली दूतावासले उनको सम्मानमा विशेष स्वागत कार्यक्रम आयोजना गरेको थियो। सो अवसरमा मन्त्री खनालले चीनमा बसोबास गरिरहेका नेपाली समुदायका प्रतिनिधि, व्यवसायी, विद्यार्थी तथा विभिन्न पेसामा आबद्ध नेपालीहरूसँग अन्तर्क्रिया गरेका थिए।