सुदूरपश्चिम सरकार र आन्दोलनरत कर्मचारीबीच पाँच बुँदे सहमति

कैलाली — सुदूरपश्चिम प्रदेश सरकार र आन्दोलनरत स्थानीय तहका कर्मचारीबीच पाँच बुँदे सहमति भएको छ । ‘स्थानीय सेवाको गठन, सञ्चालन र सेवा सर्तहरूमा व्यवस्था गर्न बनेको विधेयक’ ल्याउने विषयमा सहमति भएको हो ।

छलफलमा मुख्यमन्त्री कमलबहादुर शाहको निर्देशनमा प्रदेश सरकारकातर्फबाट पूर्वाधार विकासमन्त्री सुरेन्द्रबहादुर पाल, सांसद विक्रमसिंह धामी र सांसद चक्रबहादुर रावलसहितको टोली र कर्मचारीका तर्फबाट स्थानीय तह कर्मचारी संघर्ष समितिका संयोजक झलकबहादुर तौल र सदस्य इन्द्र रावल रहेका थिए।

सहमतिसँगै कर्मचारीले आन्दोलनका कार्यक्रम स्थगित गरेका छन् । प्रदेश सरकारले मन्त्रिपरिषद्‌बाट स्वीकृत भएर प्रदेश सभामा पेस भइसकेको सुदूरपश्चिम प्रदेश स्थानीय सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक यथाशीघ्र जारी गर्ने प्रतिबद्धता जनाएको छ ।