पाकिस्तानसँगको युद्धमा नेपालले भारतलाई साथ दिनुपर्छ: सांसद खतिवडा

काठमाडौं । नेपाली कांग्रेसका सांसद रामहरि खतिवडाले भारतले पाकिस्तानी आतंकवादविरुद्ध थालेको लडाइँमा नेपालले साथ दिनुपर्ने बताएका छन् ।

प्रतिनिधिसभाको बैठकमा बोल्दै सांसद खतिवडाले आतंकवाद साझा चुनौती भएको भन्दै त्यसविरुद्धको लडाइँमा जुनसुकै देशलाई सहयोग गर्नुपर्ने आवश्यकता औंल्याए।

‘भारतले पाकिस्तानको आतंकवादविरुद्ध सुरु गरेको कारबाहीले नेपाल पनि जोखिमयुक्त अवस्थामा पुगेको छ । यस्तो जटिल परिस्थितिको सामना गर्न सरकारले पूर्वतयारी गर्नुपर्छ,’ उनले भने, ‘आतंकवादविरुद्धको लडाइँमा जुनसुकै देशलाई पनि हामीले साथ दिनुपर्छ ।’

त्यसका साथै उनले धितो बोर्डका अध्यक्षसम्बन्धी कमिसन प्रकरणमा छानबिन गर्न माग गर्दै अख्तियार प्रमुखको अभिव्यक्तिलाई गम्भीरतापूर्वक लिन सरकारलाई सुझाव दिए।