चीनको चेतावनी – अमेरिकासँग सबै प्रकारको युद्ध लड्न तयार छौं

काठमाडौं । अमेरिकासँगको बढ्दो व्यापार युद्धका बीच चीनले जुनसुकै युद्धका लागि तयार रहेको चेतावनी दिएको छ ।

अमेरिकास्थित चिनियाँ दूतावासले विज्ञप्ति जारी गरी अमेरिकासँग सबै प्रकारको युद्ध लड्न तयार रहेको बताएको हो ।

दूतावासले एक्समा लेखेको छ, “यदि युद्ध अमेरिकाले चाहेको हो भने, यो ट्यारिफ युद्ध होस्, व्यापार युद्ध वा अन्य कुनै पनि प्रकारको युद्ध होस्, हामी अन्त्यसम्म लड्न तयार छौं ।”

अमेरिकी राष्ट्रपति डोनाल्ड ट्रम्पले मङ्गलबारदेखि चीनबाट अमेरिका आउने सामानमा थप १० प्रतिशत भन्सार शुल्क लगाउने घोषणा गरेका थिए ।

यसअघि फेब्रुअरीको सुरुमै ट्रम्पले चीनबाट आयात हुने सामानमा १० प्रतिशत शुल्क लगाइसकेका थिए । बढाएको समेत गर्दा अमेरिकाले चिनियाँ सामानमा कूल २० प्रतिशत भन्सार शुल्क लगाएको छ ।

यता, बेइजिङले पनि ‘अमेरिकाद्वारा एकतर्फी शुल्क लगाउने’ कार्यलाई निन्दा गर्दै अमेरिकाबाट विभिन्न कृषि आयातमा १० र १५ प्रतिशत शुल्क लगाउने घोषणा गरेको छ ।

विशेषज्ञहरूले बढेका आयात लागतले उपभोक्ताका लागि मूल्य बढाउन सक्ने र यसले मुद्रास्फीति कम गर्ने प्रयासलाई जटिल बनाउने चेतावनी दिएका छन् ।