गर्मी छ, टन्न पानी पिउनुहोला : तोसिमा

काठ्माण्डौ- राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनमा सहभागी हुन आएका प्रतिनिधि तथा शुभेच्छुकहरूलाई स्वास्थ्यमा विशेष ध्यान दिन आग्रह गरिएको छ।

महाधिवेशन स्वास्थ्य व्यवस्था उप-समिति संयोजक डा. तोशिमा कार्कीले अत्यधिक गर्मीका कारण स्वास्थ्य जोखिम हुन सक्ने भन्दै सतर्कता अपनाउन अनुरोध गरेकी हुन्।

चितवनको बढ्दो तापक्रमलाई मध्यनजर गर्दै संयोजक डा. कार्कीले महाधिवेशन स्थलमा रहेका सबैलाई पर्याप्त मात्रामा तरल पदार्थ सेवन गर्न सुझाव दिइन्। ‘गर्मी निकै बढेको छ, त्यसैले आफ्नो स्वास्थ्यको ख्याल गर्दै टन्न पानी पिउनुहोला,’ डा. कार्कीले भनिन्।

महाधिवेशन अवधिभर सहभागीहरूलाई तत्काल स्वास्थ्य सेवा उपलब्ध गराउन पार्टीले तीन फरक स्थानमा ‘हेल्थ डेस्क’ स्थापना गरेको छ। डा. कार्कीका अनुसार महाधिवेशनको उद्घाटन सत्र र बन्दसत्र हुने मुख्य स्थानहरूमा चिकित्सकसहितको स्वास्थ्यकर्मीको टोली परिचालन गरिएको छ।

कुनै पनि सहभागीलाई स्वास्थ्यमा समस्या देखिएमा वा असहज महसुस भएमा तत्काल नजिकैको हेल्थ डेस्कमा सम्पर्क गर्न उप-समितिले आग्रह गरेको छ। महाधिवेशनमा देशभरबाट हजारौंको संख्यामा उपस्थिति रहने भएकाले स्वास्थ्य सुरक्षालाई उच्च प्राथमिकतामा राखिएको रास्वपाले जनाएको छ।