सीमा समस्या र द्विपक्षीय सम्बन्धप्रति संवेदनशील बन्न सरकारलाई आग्रह

काठमाण्डौ – सांसदहरूले सीमासम्बन्धी विषय र द्विपक्षीय सम्बन्धका सवालमा संवेदनशील बन्नुपर्ने भन्दै सरकारको ध्यानाकर्षण गराएका छन् । प्रतिनिधिसभाको आजको बैठकमा सांसदहरूले सीमासम्बन्धी समस्याको समाधानका लागि सरकारले गम्भीर पहल गर्नुपर्ने बताएका हुन् ।

नेपाली कम्युनिस्ट पार्टी (नेकपा) का सांसद प्रमेशकुमार हमालले प्रधानमन्त्री बालेन्द्र शाहले गएको जेठ १७ गते सीमाबारे दिएको अभिव्यक्तिप्रति आपत्ति जनाउँदै यो अभिव्यक्ति संसद्को अभिलेखबाट हटाउन माग गरे । उनले परराष्ट्रमन्त्री शिशिर खनालको भर्खरैको चीन भ्रमणका क्रममा त्रिपक्षीय सीमासम्बन्धी विषयमा छलफल भए वा नभएकोबारे जानकारी दिन सरकारसँग माग गरे ।

नेपाली कांग्रेसकी सांसद रेखाकुमारी यादवले प्रधानमन्त्री शाहको सीमासम्बन्धी अभिव्यक्तिबारे स्पष्ट धारणा सार्वजनिक गर्न माग गर्दै सुस्तालगायत सीमावर्ती क्षेत्रमा देखिएका समस्याप्रति सरकार गम्भीर हुनुपर्ने बताए ।

नेकपा एमालेकी सांसद टुकाभद्रा हमालले राष्ट्रियता र नेपाली भू–भागको संरक्षणलाई सर्वोच्च प्राथमिकतामा राखेर सरकार अघि बढ्नुपर्नेमा जोड दिए ।

श्रम संस्कृति पार्टीका सांसद हर्क साम्पाङले भारतले सीमावर्ती क्षेत्रमा बाँध निर्माण गरेका कारण रौतहटको गौर क्षेत्रमा डुबानको समस्या बढेको उल्लेख गर्दै यसको समाधानका लागि सरकारले कूटनीतिक पहल गर्नुपर्ने बताए ।

सांसदहरूले सीमासम्बन्धी विषय राष्ट्रिय हित र कूटनीतिक सम्बन्धसँग प्रत्यक्ष जोडिएको संवेदनशील विषय भएकाले सरकारलाई जिम्मेवार र सावधानीपूर्वक कदम चाल्न आग्रह गरेका छन् । उनीहरूले मध्यपूर्वमा युद्धविराम हुँदा पनि पेट्रोलियम पदार्थको मूल्य नघटाएको भन्दै सरकारप्रति आक्रोश पनि व्यक्त गरेका छन् ।