अर्थमन्त्रीले तत्काल राजीनामा दिनुपर्छ : प्रेमप्रसाद दंगाल

काठमाडौं । राष्ट्रियसभामा एमाले संसदीय दलका नेता प्रेमप्रसाद दंगालले अर्थमन्त्री डा. स्वर्णिम वाग्लेले पदबाट राजीनामा दिनुपर्ने माग गरेका छन् ।

संसद्‌मा आर्थिक विधेयक र आय, व्ययको अनुमान समेत प्रस्तुत भइसकेपछि करको दर हेरफेर गर्ने अपराध गरेकाले अर्थमन्त्री वाग्लेले पदबाट राजीनामा दिनुपर्ने उनको तर्क थियो ।

सोमबार प्रतिनिधिसभा बैठकमा सरकारको आगामी आर्थिक वर्षको बजेटमाथिको छलफलमा भाग लिँदै नेता दंगालले संसदीय छानबिन समिति गठन गरी अर्थमन्त्रीमाथि छानबिन गरी कारबाही गर्नुपर्ने बताए ।

सरकारले ल्याएको बजेटले समाजवादउन्मुख अर्थतन्त्र निर्माण गर्ने लक्ष्य नलिएको भन्दै उनले असन्तुष्टि जनाए ।

“संसद्‌मा राजश्व र व्ययको अनुमान र आर्थिक विधेयक प्रस्तुत भइसकेपछि करका दरहरू हेरफेर गरियो । यो घटनाको सत्यतथ्य तत्काल छानबिन गर्न जरुरी छ । र, दोषउपर कडा कारबाही गर्न जरुरी छ,” उनले भने, “यत्रो घटना नेतृत्वको संलग्नता बेगर सम्भव नै छैन । त्यसो हुनाले अर्थमन्त्रीले तत्काल राजीनामा दिनुपर्दछ । संसदीय छानबिन समिति गठन गर्नुपर्दछ ।” न्युज एजेन्सी नेपाल