भारततर्फ सर्वाधिक निर्यात गर्ने लिट्मस सम्मानित

काठमाडौं, २५ जेठ । लिट्मस इन्डस्ट्रिज लिमिटेडले नेपाल उद्योग परिसंघ (सीएनआई) को २३औँ वार्षिक साधारण सभामा ‘भारततर्फ सबैभन्दा बढी निर्यात गर्ने उद्योग’ विधाअन्तर्गत सम्मान प्राप्त गरेको छ।

सीएनआईका सदस्य उद्योगहरूमध्ये भारततर्फ सर्वाधिक निर्यात गर्ने उद्योगका रूपमा लिट्मस इन्डस्ट्रिजलाई उक्त सम्मान प्रदान गरिएको हो। कम्पनीले गुणस्तर, नवप्रवर्तन र उत्पादन उत्कृष्टतामा निरन्तर प्रतिबद्धता जनाउँदै निर्यात क्षेत्र विस्तार तथा राष्ट्रिय अर्थतन्त्रमा योगदान पुर्‍याएको भन्दै सम्मानित गरिएको जनाएको छ।

लिट्मस इन्डस्ट्रिज नेपालकै सबैभन्दा ठूलो तार, केबल तथा कन्डक्टर उत्पादन गर्ने उद्योग हो। साथै, नेपालमा एल्युमिनियम तथा एल्युमिनियम अलोय (AA) रड उत्पादन गर्ने एकमात्र उद्योगका रूपमा परिचित छ।

कम्पनीका प्रमुख सञ्चालन अधिकृत (सीओओ) प्रकाश काफ्लेले प्राप्त सम्मानलाई कम्पनीका कर्मचारीहरूको मेहनत, समर्पण र प्रतिबद्धताको परिणाम भएको बताए। उनले आगामी दिनमा पनि निर्यात विस्तार, अन्तर्राष्ट्रिय बजारमा उपस्थिति सुदृढीकरण तथा नेपालको औद्योगिक विकासमा योगदान बढाउने प्रतिबद्धता व्यक्त गरे।

लिट्मसले प्रत्यक्ष तथा अप्रत्यक्ष रूपमा रोजगारी सिर्जना, आयात प्रतिस्थापन तथा सहायक उद्योगहरूको विकासमा समेत योगदान पुर्‍याउँदै आएको जनाएको छ। कम्पनीले उत्पादन क्षमता विस्तार, आधुनिक प्रविधिको प्रयोग र दक्ष जनशक्ति विकासमार्फत नेपालको दीर्घकालीन आर्थिक समृद्धिमा टेवा पुर्‍याइरहेको बताएको छ।

कम्पनीका अनुसार यो सम्मानले नेपालको औद्योगिक उत्कृष्टता, उत्पादन क्षमता तथा निर्यात प्रतिस्पर्धात्मकतालाई थप मजबुत बनाउने विश्वास लिइएको छ।