यू–१९ राष्ट्रिय महिला ट्वान्टी–२० क्रिकेट : सुदूरपश्चिमको लगातार तेस्रो जित

सुर्खेत । सुर्खेतको वीरेन्द्रनगरमा जारी यू–१९ राष्ट्रिय महिला ट्वान्टी–२० क्रिकेट प्रतियोगितामा सुदूरपश्चिम प्रदेशले लगातार तेस्रो जित दर्ता गरेको छ । मधेस प्रदेशले पनि लगातार दोस्रो जित हासिल गरेको छ । घरेलु टोली कर्णाली प्रदेशले भने लगातार दोस्रो हार व्यहोरेको छ ।

सोमबार (जेठ २४) कालुङचोक मैदानमा भएको खेलमा मधेसले कर्णालीलाई नौ विकेटको फराकिलो अन्तरले हरायो । योसँगै मधेसले चार अंक जोडेको छ । मधेसले यसअघि पहिलो खेलमा कोसी प्रदेशलाई पराजित गरेको थियो ।

आफ्नो दोस्रो खेलमा पहिले ब्याटिङ गरेको कर्णालीले निर्धारित २० ओभरमा चार विकेट गुमाएर १०३ रन बनाएको थियो । टोलीकी कप्तान तिर्सना विश्वकर्माले अविजित ४९ रनको पारी खेलिन् । उमा चौधरीले २९ रनको योगदान दिइन् ।

कर्णालीलाई तिर्सना र उमाले चौथो विकेटका निम्ति ८६ रनको साझेदारी गर्दै सम्मानजनक योगफलसम्म पुर्‍याएका थिए ।

१०४ रनको लक्ष्य मधेसले ९.१ ओभरमा एक विकेट गुमाएर पूरा गर्‍यो । मधेसकी ओपनर सना प्रविन ४४ रनमा अविजित रहिन् । अलिशा यादवले ४७ रनको आक्रामक पारी खेल्दै टोलीलाई सहज जित दिलाइन् ।

अलिशा अर्धशतकनजिक पुग्दा कर्णालीकी समीक्षा बिसीको बलमा एलबीडब्ल्यू आउट भएकी थिइन् ।

सुदूरपश्चिमले लुम्बिनीलाई हरायो
सोमबारै वीरेन्द्रनगर मैदानमा भएको अर्को खेलमा सुदूरपश्चिमले लुम्बिनी प्रदेशलाई आठ विकेटले पराजित गर्‍यो ।

टस जितेर पहिले ब्याटिङ गरेको लुम्बिनीले २० ओभरमा पाँच विकेट गुमाएर १४१ रन बनाएको थियो । लुम्बिनीका निम्ति ओपनर अञ्जी पाठकले ७६  र आशना चौधरीले २४ रन जोडे । अरू ब्याटरले दोहोरो अंक छुन सकेनन् ।

जवाफमा सुदूरपश्चिमका ओपनरले उत्कृष्ट प्रदर्शन गर्दै १३२ रनको साझेदारी गरे । सुदूरपश्चिमकी सावित्री धामीले ७६ रनको अविजित पारी खेलिन् । करुणा विष्टले ४५ रन बनाइन् ।

सुदूरपश्चिमले यसअघि कोसी र वाग्मती प्रदेशलाई हराएको थियो । सुदूरपश्चिमले लगातार तेस्रो जितसँगै ६ अंक जोडेको छ । सुदूरपश्चिमले अंकतालिकाको शीर्ष स्थानमा आफ्नो पकड बलियो बनाएको छ । मधेस पनि लगातार दुई जितपछि उपाधि होडमा मजबुत देखिएको छ ।