Month: September 2025

चितवन ५ असोज । दसैँको मुखमा सवारीसाधनको चाप बढ्दै गएका वेला शुक्रबार साँझ साढे ६ बजेदेखि अवरुद्ध मुग्लिन–नारायणगढ सडकखण्ड शनिबार दिनभरको प्रयासमा पनि खुल्न सकेन । पहिरोले अवरुद्ध झन्डै डेढ सय मिटर सडक खुलाउने प्रयास शनिबार रातिसम्म सफल नभएपछि हजारौँ यात्रु बिचल्लीमा परेका छन् ।

मुग्लिङ बजारदेखि करिब दुई किलोमिटर दक्षिणपट्टि रहेको चितवनको इच्छाकामना गाउँपालिका– ६ स्थित तुइन खोला पुलछेउमा पहिरो गएपछि सडक दुईतर्फी अवरुद्ध भएको थियो । शुक्रबार साँझदेखि नै सडक खुलाउन पहल थाले पनि निरन्तर ठुल्ठुला ढुंगासहित पहिरो खसेपछि काम अघि बढ्न सकेन । शनिबार वर्षा नभए पनि सुक्खा पहिरो थियो ।

सडक खुलाउन नारायणगढपट्टि दुई र मुग्लिनपट्टि तीन गरेर पाँचवटा मेसिन परिचालन भएका थिए । शनिबार साँझ साढे ६ बजेतिर सडक खुलाउन अधिकांश काम सकिए पनि पुन: ठुला ढुंगासहितको पहिरो खस्दा समस्या भएको चिवतनका प्रमुख जिल्ला अधिकारी गणेश अर्यालले बताए । उनका अनुसार मानवीय हताहत भने छैन ।

‘एक–डेढ घण्टामा सडक खुल्ने आशा थियो । तर, भूकम्प आएजसरी ठुल्ठुला ढुंगासहित पुन: पहिरो आयो । त्यसले मेसिनलाई पनि क्षति पुर्‍यायो । यद्यपि, मानवीय क्षति भएन । त्यसपछि सुरक्षाको दृष्टिकोणलाई ध्यानमा राख्दै शनिबार रातिलाई बाटो खोल्ने काम स्थगित गरिएको छ,’ उनले भने, ‘आइतबार बिहान साढे ४ बजेदेखि पुन: काम सुरु गर्छाैँ । तर, वेलावेला पहिरो खसेकाले कति समय लाग्छ भनेर यकिन गर्न गाह्रो छ ।’

पटक–पटक सुक्खा पहिरो खसेपछि सडक खुलाउन नसकेको सडक डिभिजन भरतपुरका प्रमुख नारायणप्रसाद लामिछानेले बताए । उनका अनुसार त्यस क्षेत्रको भौगोलिक बनावट यसै पनि कमजोर छ । त्यसमाथि त्यहाँ टुक्रे चट्यान छ । त्यसले गर्दा पहिरो रोकिन समय लागेको उनको भनाइ छ । ‘पहिरोले डेढ सय मिटरभन्दा बढी सडक अवरुद्ध गरेको छ । कहिलेसम्म खुलाउन सकिन्छ भन्नै सकिन्न । निर्वाध रूपमा काम भए ८–१० घण्टा लाग्न सक्छ,’ उनले भने ।

सडक अवरुद्ध हुँदा दुईतिर गरेर हजारौँ गाडी अलपत्र परेको तथा दसैँका वेला यात्रा सहज बनाउन कठिन परिस्थिति आएको चितवनका प्रमुख जिल्ला अधिकारी अर्यालले बताए । ‘अहिले दुवैतर्फ ६–७ सय गाडी अलपत्र छन् । त्यसमा हजारौँ यात्रु अलपत्र छन्,’ उनले भने, ‘सडक कहिले खुल्छ भनेर भन्न सक्ने अवस्था छैन । दसैँका वेला कठिन परिस्थिति आयो ।’

काठमाडौं ५ असोज । इजरायलले गाजामा सैन्य कारबाही बढाएपछि हमासको सशस्त्र शाखाले शनिबार गाजामा रहेका ४८ जना बन्दीको ‘बिदाइ तस्बिर’ भन्दै सामूहिक फोटो सार्वजनिक गरेको छ । अलजजिरा र इजरायलका सञ्चारमाध्यमले प्रकाशन गरेको सामूहिक तस्बिरमा २३ असोज ०८० देखि हमास समूहको नियन्त्रणमा रहेका नेपाली नागरिक विपिन जोशी पनि छन् ।

अनलाइनमार्फत सार्वजनिक तस्बिरमा जीवित र मृतक बन्दीहरूको अनुहार देखाइएको छ र सबैको नाममा ‘रोन अराड’ लेखिएको छ । यो नाम १९८६ मा लेबनानमा हराएका इजरायली वायुसेना क्याप्टेनसँग सम्बन्धित छ । उनलाई हमासले नियन्त्रणमा लिएर मारेको मान्ने गरिन्छ ।

हमासले बिहीबार नै इजरायली आक्रमण बढ्दै गए बन्दीको जीवन संकटमा पर्न सक्ने चेतावनी दिएको थियो । हमासको अल–कस्साम ब्रिगेडको वक्तव्यमा थियो, ‘तिमीहरूका बन्दीहरू गाजासिटीका बस्तीहरूमा फैलिएका छन्, । अपरेसन विस्तारको अर्थ हो कि तिमीहरूले कुनै पनि बन्दी प्राप्त गर्नेछैनौँ–न त जीवित, न त मृत । गाजा तिम्रा सैनिकहरूको चिहान हुनेछ ।’

यसैको श्रृंखलामा हमासले शनिबार बिदाइ तस्बिर भनेर सार्वजनिक गरेको हो । ‘हमास समूहको कास्साम ब्रिगेडले गाजामा रहेका ४८ जना बन्दीको एउटा तस्बिर सार्वजनिक गरेको छ, जसलाई उसले बिदाइ तस्बिर भनेर उल्लेख गरेको छ,’ अलजजिरामा माजियार मोतामेदीले समाचार लेखेका छन् ।

इजरायलका लागि नेपाली राजदूत धनप्रसाद पण्डितले यसबारे कुनै जानकारी नभएको बताए । ‘आधिकारिक रूपमा यस सम्बन्धमा हामीलाई जानकारी आएको छैन,’ राजदूत पण्डितले टेलिफोनमा नयाँ पत्रिकासँग भने । राजदूत पण्डितलाई विपिनका परिवारले पनि सोधखोज गरेका थिए । उनले परिवारलाई पनि आफूलाई जानकारी नभएको र इजरायली अधिकारीसँग सम्पर्क गरेर जवाफ दिने बताएका थिए ।

इजरायली प्रधानमन्त्री बेन्जामिन नेतान्याहुले हमाससँग कुनै पनि सहमति गर्न अस्वीकार गरेको र इजरायली सेना प्रमुख एयाल जामिरले आक्रमण जारी राखेकै वेला हमासको चेतावनी आएको अलजजिराले जनाएको छ । बिदाइ तस्बिर सार्वजनिक हुनुलाई इजरायली अधिकारीले भने परिवारजनमार्फत हमास समूहले सैन्य अपरेसन रोक्न दिएको दबाबका रूपमा लिएका छन् ।

हमासको कब्जामा रहेका ५० मध्ये २० जना जीवित रहेको इजरायली अधिकारीहरूको विश्वास छ । इजरायलको सुरक्षा फौजले परिवारजनलाई बन्दीहरूको अवस्थाबारे यकिन सूचना नभएको जानकारी दिएका छन् । टाइम्स अफ इजरायलले शनिबार प्रकाशित गरेको समाचारअनुसार हमासको कब्जामा रहेकामध्ये कम्तीमा २६ जनाको मृत्यु पुष्टि भइसकेको छ र उनीहरूको शव हमासको नियन्त्रणमा छ । ‘२० जना अझै जीवित रहेको विश्वास गरिन्छ भने दुईजनाको अवस्था गम्भीर भएको आशंका छ,’ जेरुसेलम पोस्टले लेखेको छ ।

०८० असोज २३ मा निर ओज र किबुज आलुमिमबाट हमास समूहले गरेको हमलापछि उसले २५१ जनालाई अपहरण गरेको थियो । गत वर्ष जनवरीदेखि मार्च २०२४ सम्म भएको युद्धविरामको अवधिमा हमासले ३० जना बन्धक (२० जना इजरायली नागरिक, पाँचजना सैनिक र पाँचजना थाई नागरिक)लाई मुक्त गरेको थियो भने आठजना मृत इजरायली बन्धकको शव पनि फर्काइएको थियो । मे २०२४ मा हमासले एकजना अमेरिकी–इजरायलीलाई पनि रिहा गरेको थियो ।

त्यसअघि, नोभेम्बर २०२३ को अन्त्यमा भएको सातदिने युद्धविरामका क्रममा हमासले १०५ जना नागरिकलाई रिहा गरेको थियो । त्यहीबिचमा थप चारजना बन्धक मुक्त भएका थिए । तर, नेपाली नागरिक विपिन जोशीको अवस्था अझै अज्ञात छ ।

काठमाडौं । प्रधानमन्त्री तथा मन्त्रीपरिषद्को कार्यालयले सार्वजनिक सेवा लिँदा कतै ढिलासुस्ती गरे वा घुस मागे सिँधै फोन गर्न आग्रह गरेको छ। शनिबार एक सूचना जारी गर्दै प्रधानमन्त्री कार्यालयले फोन गर्न ‘हटलाइन नम्बर’ पनि सार्वजनिक गरेको छ।

‘सार्वजनिक सेवा प्रवाह गर्ने कुनै पनि सेवा प्रदायक मन्त्रालय,  कार्यालय, निकायमा सेवाग्राहीको काममा ढिलासुस्ती, मोल मोलाहिजा, काम पन्छाउने, घुस–रिसवत माग्ने, अनावश्यक दुःख हैरानी दिने, सेवाग्राहीसँग अपमानजनक व्यवहार गर्ने जस्ता कार्य भएमा देहायका नम्बरमा सम्पर्क गर्नुहुन सम्बन्धित सरोकारवालाहरूमा अनुरोध गरिन्छ,’ सूचनामा भनिएको छ।

प्रधानमन्त्री कार्यालयले हटलाइन नम्बर ९८५११४५०४५ पनि सार्वजनिक गरिएको छ।

काठमाडौं ४ असोज । नवनियुक्त अर्थमन्त्री रामेश्वर खनालले पुँजी बजारको समस्या समाधान गर्न सक्रियता देखाएका छन् । जेन–जी आन्दोलनपछि पहिलोपटक बिहीबार खुलेको सेयर बजार नेप्से परिसूचक तीनपटक उच्च दरमा घटेपछि अर्थमन्त्री खनालले पुँजी बजारमा देखिएका समस्या पहिचान र समाधानको उपाय खोज्न कार्यदल नै गठन गरेका हुन् । बजारमा देखिएका समस्या र विसंगति अध्ययन गरी समाधानका लागि अर्थ मन्त्रालयले कार्यदल गठन गरेको मन्त्रालयका प्रवक्ता टंकप्रसाद पाण्डेयले जानकारी दिए । कार्यदलले लगानीकर्ताको मनोबल बढाउने प्रणालीगत तथा प्रक्रियागत सुधारका लागि सुझावसहित ठोस कार्ययोजना पाँच कार्यदिनभित्र पेस गर्ने उनले बताए ।

अर्थमन्त्रीस्तरको शुक्रबारको निर्णयअनुसार बनेको कार्यदलमा नेपाल धितोपत्र बोर्डका कार्यकारी निर्देशक (कामु) रूपेश केसी संयोजक छन् । त्यस्तै, नेपाल राष्ट्र बैंकका निर्देशक शरण अधिकारी, नेपाल स्टक एक्सचेन्ज लिमिटेडका कार्यकारी निर्देशक (कामु) निरञ्जन फुयाँल सदस्य छन् । अर्थ मन्त्रालयका उपसचिव शरद निरौला सदस्य सचिवका रूपमा छन् । मन्त्रालयका अनुसार कार्यदलले तत्कालीन समस्या समाधान र पुँजी बजारलाई दीर्घकालीन रूपमा सुदृढ बनाउनुपर्ने कदमबारे ठोस कार्ययोजना ल्याउने अपेक्षा गरिएको छ ।

१६ भदौमा २७६१.८६ विन्दुमा पुगेको बजार परिसूचक त्यसपछि निरन्तर ओरालो लागिरहेको छ । यसबिच ६ कार्यदिन मात्रै खुलेको बजारमा २४९.९५ अंकले परिसूचक घटेको छ । बजार पुँजीकरण ४१ खर्ब ९९ अर्ब रुपैयाँ कायम भएको छ । बिहीबार नेप्से परिसूचक १६०.३३ अंकले घटेर २५११.९१ विन्दुमा रोकियो । बजार खुलेको करिब एक घण्टामै तीनपटक सर्किट ब्रेक लागेर नेप्से बन्द भयो । जेन–जी आन्दोलनका कारण स्थगित भएको सेयर बजारमा खुलेको पहिलो दिन नै ठुलो पहिरो गएपछि अर्थमन्त्रीले समस्या पहिचान र सुधारको अध्ययनका लागि कार्यदल गठन गरेका हुन् ।

सरकारले पुँजी बजारका समस्या पहिचान र सुधारका लागि भन्दै पटक–पटक अध्ययन तथा सुझाव कार्यदल गठन गर्दै आइरहेको छ । तर, त्यस्ता कार्यदलले दिएका सुझाव कार्यान्वयनको अवस्था भने कमजोर रहेको छ ।