नेपाली राष्ट्रिय महिला टोलीको प्रशिक्षकमा न्यौपाने नियुक्त

काठमाडौं । अखिल नेपाल फुटबल संघ (एन्फा)ले नवीन न्यौपानेलाई नेपाली राष्ट्रिय महिला फुटबल टोलीको प्रशिक्षकमा नियुक्त गरेको छ । बिहीबार (असोज ९) एन्फाले न्यौपानेलाई प्रशिक्षक नियुक्त गरेको हो ।

एन्फाले न्यौपानेको कार्यकाल आगामी साफ वुमन्स च्याम्पियनसिपसम्म रहने पनि जनाएको छ । उनीसँगै एन्फाले टोलीको सहायक प्रशिक्षकमा भगवती थापा र राजकुमार केसीलाई नियुक्त गरेको छ । विन्दा देवान टिम व्यवस्थापक हुँदा शिला गिरी फिजियो थेरापिस्ट नियुक्त भएकी छन् ।

यसअघि प्रशिक्षक न्यौपानेले ताजकिस्तानमा एएफसी एसियन यू–२३ एसियन कप खेलेको नेपाली टोलीको जिम्मेवारी सम्हालेका थिए ।

च्याम्पियनसिप आगामी मंसिर २९ देखि सुरु हुनेछ । प्रतियोगितामा पाँच दक्षिण एसियाली मुलुकको सहभागिता रहने जनाइएको छ । १६ दिनसम्म चल्ने यो प्रतियोगिताका सम्पूर्ण खेल काठमाडौंको त्रिपुरेश्वरस्थित दशरथ रंगशालामा हुने तालिका छ ।

च्याम्पियनसिपमा नेपालले सात पटकसम्म उपस्थिति जनाइसकेको छ । भारत हालसम्मको सर्वाधिक विजेता हो । भारतले सन् २०१०, २०१२, २०१४, २०१६ र २०१९ मा उपाधि उचालेको थियो । बंगलादेशले भने सन् २०२२ मा पहिलो पटक उपाधि जितेको थियो ।