वेस्ट इन्डिजविरुद्ध खेल्ने नेपाली टिमको घोषणा

काठमाडौं । वेस्ट इन्डिजविरुद्धको ट्वान्टी–२० शृंखलाका निम्ति नेपाली राष्ट्रिय क्रिकेट टिमको घोषणा गरिएको छ । मुख्य प्रशिक्षक स्टुवर्ड लले सोमबार (भदौ ३०) रोहितकुमार पौडेलको कप्तानीमा १६ सदस्यीय राष्ट्रिय टिमको घोषणा गरेका हुन् ।

नेपाली टिममा अलराउन्डर मोहम्मद आदील आलमले पुनरागमन गरेका छन् । ०७९ सालमा आयोजित नेपाल टी–२० प्रतियोगितामा ‘स्पट फिक्सिङ’ मुद्दामा मुछिएपछि आदील राष्ट्रिय टिमबाट बाहिर थिए ।

नेपालले युनाइटेड अरब इमिरेट्स (यूएई)मा तीन खेलको शृंखला खेल्ने तालिका छ । नेपाली क्रिकेटको इतिहासमा विश्वकप विजेतासँग हुन लागेको यो पहिलो टी–२० शृंखला समेत हो ।

नेपालले सेप्टेम्बर २७ मा शृंखलाको पहिलो खेल खेल्ने छ । सेप्टेम्बर २९ मा दोस्रो खेल खेल्नेछ । सेप्टेम्बर ३० मा तेस्रो तथा अन्तिम खेल खेल्नेछ । यी सबै खेल शारजाह क्रिकेट रंगशालामा हुनेछ ।

नेपाल क्रिकेट संघ (क्यान)ले यी दुई टिमबीचको शृंखलालाई ‘युनिटी कप’ नाम दिएको छ । क्यानले यो शृंखला ‘जेनजी’ प्रदर्शनका क्रममा ज्यान गुमाएकाप्रति समर्पित रहेको जनाएको छ ।