चार किशोरको मृत्युपछि शोकमा धनगढी

धनगढी, १३ भदौ ।
नदीमा नुहाउने क्रममा चार जना किशोरको मृत्यु भएपछि धनगढी शोकमा डुबेको छ ।

मृतक किशोरहरुका परिवारजन  विक्षिप्त छन् । परिवारजन र आफन्तहरु गहिरो शोकमा डुबेका छन् । मृतक परिवारजनमा रुवावासी थामिएको    छैन् ।

बाल्मिकी ईन्टरनेशनल स्कुलले शोक बिज्ञप्ति जारी गर्दै दिवगंत छात्रहरुको आत्माको चीरशान्तिको कामना गर्दै शोक सन्तप्त परिवारजन प्रति समवेदना व्यक्त गरेको छ ।

त्यस्तै गार्डनर ईगलिस स्कुलले समेत आफ्ना पूर्व विद्यार्थी भण्डारी दाजुभाई सहित चार जना किशोरको मृत्युको घट्नामा दुःख व्यक्त गरेको छ ।

चार किशोरको मृत्युको घट्नाबाट धनगढीवासी स्तब्ध भएका छन् । राजनैतिक दलका नेता, प्रदेश सभा सदस्य, शिक्षक, सर्वसाधारण सबैले सामाजिक सञ्जालमा मृतक किशोरहरुप्रति श्रद्धाञ्जली र परिवारजनप्रति समवेद्ना प्रकट गरिरहेका छन् ।

धनगढी उपमहानगरपालिका -५ का वडा अध्यक्ष गजेन्द्र बहादुर शाहीले किशोरहरुको मृत्युमा दुःख व्यक्त गर्दै उनीहरुको मृत्यु हुनुमा जनप्रतिनिधिहरु पनि जिम्मेवार रहेको बताएका छन् । नदीको गहिराई भएको स्थानमा कुनै संकेत नराखिनुले यति ठूलो मानवीय क्षति भएको शाहीको भनाई छ ।

धनगढीबाट साथीको जन्मदिन मनाउन गोदावरी नगरपालिका–९ भल्का गएका सात जना मध्ये चार जना किशोरको खुटिया नदीमा डुबेर बिहीबार दिउँसो मृत्यु भएको थियो ।

नदीमा डुबेका एक जना साथीलाई बचाउन खोज्दा धनगढीका चार जनाको किशोरको ज्यान गएको हो । उनीहरुसंगै गएका तीन किशोर भने जोगिएका छन् ।

मृत्यु हुनेमा धनगढी उपमहानगरपालिका–४ का १६ वर्षीय जेफ भण्डारी र जाबेज भण्डारी दुबै जोयल भण्डारी र क्रान्ति भण्डारीका जुम्ल्याहा सन्तान हुन् । धनगढी–४ तारानगरका डिल्लीराज जोशी र हरिप्रिया जोशीका १७ वर्षीय छोरा सक्षम जोशी, धनगढी–५ जाइका बलिराम चौधरी र सोनदेवी चौधरीका १५ वर्षीय छोरा प्रतीक चौधरीको पनि डुबेर मृत्यु भएको छ । उनीहरुमध्ये तीन जना स्कुल र एक जना ग्यालेक्सी स्कुलमा कक्षा ११ मा अध्ययनरत थिए ।

मृत्यु भएकाहरु मध्ये प्रतिक, सक्षम जोशी र जावेज वाल्मीकि इन्टरनेसनल धनगढीमा र जेफ ग्यालेक्सी उच्च माध्यमिक विद्यालयमा कक्षा ११ मा अध्ययनरत थिए । जेफ र जाबेज जुम्ल्याहा दाजुभाई हुन् ।

दिउँसो साढे १२ बजेतिर नदीमा डुबेका चारै जनाको शव करीव चार घण्टापछि स्थानीयवासी, नेपाल प्रहरी र सशस्त्र प्रहरी बलको सहयोगमा अपराह्न ४ बजे फेला परेको थियो ।

सातै जना साथीले जन्मदिनको रमाइलो गर्दै खाना खाएपछि वारिपट्टी फर्कने क्रममा डुबेका हुन् । एक जना डुबेपछि बचाउन खोज्दा अन्य तीन जनाको पनि ज्यान गएको देखिन्छ । बाँकी तीन जना भने पारिपट्टी नै रोकिएका कारण सकुशल रहे ।

समूहमा सहभागी सात जनामध्ये नवीन डडाल, युवराज कुँवर र आकाश मल्ल भने सकुशल रहेका छन् । उनीहरूलाई घटनास्थल नजिकै अर्धनग्न अवस्थामा भेटिएको प्रहरीले जनाएको छ । उद्दारपछि पोष्टमार्टमका लागि सेती प्रादेशिक अस्पतालमा राखिएका शवहरु पोस्टमार्टमपछि परिवारजनलाई बुझाउने तयारीमा रहेको प्रहरीले जनाएको छ ।